Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 389 Hüküm no: 517 Orijinal metin no: [77b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemah kalesi müstahfızlarından Mehmed ve Eyüb’ün Mardiros v. Mıgırdiç’in timarları reayası olup ödemediği vergilerini talep ettikleri davanın reddi Vilâyet-i Anadolu’da vâki‘ Kemah kal‘ası müstahfızlarından olup her biri ale’l-iştirâk Vartanes nâm karye ve gayrıdan ikişer bin akçe timara mutasarrıf olan Mehmed Bey b. Eyüb ve Eyüb Bey b. Ali nâm kimesneler mahfil-i kazâda mahmiye-i Galata’da Kürkçükapısı kurbunda sâkin râfi‘-i hâze’s-sifr Mardiros v. Mıgırdiç nâm Ermeni muvâcehesinde her biri üzerine da‘vâ ve takrîr-i kelâm edip merkūm Mardiros berât-ı pâdişâhî ile mutasarrıf olduğumuz karye-i merkūme re‘âyâsından olmağla yirmi seneden beri üzerlerine edâsı lâzım gelen rüsûm-ı ra‘iyyetini hâlâ taleb eylediğimde edâdan imtinâ‘ eder, suâl olunsun dedikde gıbbe’s-suâl merkūm Mardiros cevâbında ben yirmi seneden mütecâviz mahmiye-i mezbûrede sâkin olup karye-i mezbûreden ve merkūmânın defterli re‘âyâsından olmadığımdan mâ‘adâ ebâ an ceddin mezbûrâna rüsûm-ı ra‘iyyet veregeldiğimiz yokdur deyû vech-i mezkûr üzre re‘âyâ olduğunu bi’l-külliyye inkâr edicek müdde‘iyân-ı mezbûrândan müdde‘âlarını isbâta ve mezkûrun re‘âyâ olduğunu nâtıka sûret-i defter-i hâkānî ibrâzına kādirler olmamağın mezbûrân Mehmed Bey ve Eyüb Bey bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Süleyman b. Hasan, Mehmed b. Ömer, Mustafa b. Âbid, el-Hâc Ali b. Abdullah, Mustafa Çelebi b. Receb, Hamza b. Abdülganî.