Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 389 Hüküm no: 518 Orijinal metin no: [77b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murat v. Manuk’un, vefat eden babasının terekesinden kendisine intikal eden hissesini kardeşi Asvador’dan teslim aldığı Mahmiye-i Galata dâhilinde Sultan Bayezid mahallesinde sâkin iken bundan akdem hâlik olan Manuk v. Kelhoş Ermeni’nin verâseti sulbî kebîr oğulları Murad ve Asvador nâm zimmîlere münhasıra olduğu şer‘an zâhir [ve] mütehakkik oldukdan sonra mezbûr Murad meclis-i şer‘-i hatîr-i lâzımü’t-tevkīrde hâlik-i mezbûrun muhallefâtına vâzı‘ü’l-yed olan işbu râfi‘ü’l-kitâb merkūm Asvador muvâcehesinde ikrâr ve i‘tirâf edip babam hâlik-i mezbûrun muhallefâtından nukūd ve menkūlât ve esâs-ı beyt ve evânî-i nühâsiyye ve gayr-ı nühâsiyye ve bi’l-cümle ismi mâl ıtlâk olunur eşyâsından hisse-i şer‘iyye-i ma‘lûmemi mezbûr Asvador’un yedinden tamâmen ahz ü kabz edip sâir tereke-i hâlik-i merkūme müte‘allika da‘vâdan mezbûr Asvador’un zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, ba‘de’l-yevm merkūm ile vechen mine’l-vücûh da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Efendi b. Musa, Mustafa Çelebi b. Abdullah, Mehmed Çelebi b. el-Hâc Mustafa, İbrahim b. Abdi, Yusuf b. Osman, Ahmed Yazıcı b. Mehmed.