Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 390 Hüküm no: 519 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Halil’in eşi Şaban b. Hasan’dan muhâlaa yoluyla boşandığı Mahrûsa-i Galata’ya tâbi‘ kasaba-i Kasımpaşa mahallâtından Bedreddin Bey mahallesinde sâkine Âişe bt. Halil nâm hâtun mahfil-i kazâda zevc-i muhâlı‘ı işbu râfi‘ü’l-kitâb Şaban [b.] Hasan nâm kimesne muvâcehesinde bi tav‘ihâ ikrâr ve takrîr-i kelâm edip zevcim mezbûr Şaban zimmetinde mütekarrir ve ma‘kūdun aleyh olan sekiz yüz akçe mehr-i müeccelimden fâriğa olup nafaka-i iddet [ve] me’ûnet-i süknâm dahi kendi üzerime olmak üzre zevcim mezbûr Şaban ile muhâla‘a-i sahîha-i şer‘iyye ile muhâla‘a edip mezbûr Şaban dahi hul‘-ı mezbûru kabûl eyledikden sonra hukūk-ı zevciyyete müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed b. Süleyman, Memi b. Süleyman, Osman [b.] Ali, el-Hâc Ramazan b. Mehmed, Ahmed Yazıcı b. Mehmed, Mustafa Çelebi b. Receb.