Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 390 Hüküm no: 520 Orijinal metin no: [78a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitraki v. Manol, evini bütün müştemilatıyla Yanaki v. Papa Kanaka’ya sattığı Mahmiye-i Galata müzâfâtından Marmara nâhiyesine tâbi‘ Burgos nâm karye sükkânından Dimitraki v. Manol nâm zimmî mahfil-i kazâda işbu râfi‘ü’l-kitâb Yanaki v. Papa Kanaka nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ silk-i mülk-i sahîhinde münselik olan bir tarafı Musa Çelebi mülkü ve bir tarafı Süleyman Çelebi mülkü ve iki tarafı tarîk-i âm ile mahdûd üç bâb fevkānî oda ve bir mahzen ve sâhil-i bahrde vâki‘ bir tarafı mezbûr Musa Çelebi mülkü ve bir tarafı merkūm Süleyman Çelebi mülkü ve iki tarafı tarîk-i âm ile mahdûd fevkānî bir bâb oda ve bir mahzeni müştemil mülk menzilimi bi cümleti’t-tevâbi‘ ve’l-levâhık kâffeti’l-hukūk ve’l-merâfık mezbûr Yanaki’ye nakid ve râyic fi’l-vakt yirmi beş bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yirmi beş bin akçeyi mezbûr Yanaki yedinden bi’t-tamâm alıp kabz eyledim ba‘de’l-yevm zikr olunan menzil-i merkūm Yanaki’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, Nasuh Efendi b. Yusuf, Muharrem b. Receb, Hüseyin b. Mirza, Hamza b. Abdülganî.