Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 391 Hüküm no: 521 Orijinal metin no: [78a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andelib bt. Abdullah’ın boşandığı eşi Ali Beşe’nin zimmetini ibra ettiği Mahmiye-i Galata müzâfâtından İstinye nâhiyesine tâbi‘ Zekeriyaköy demekle ma‘rûf karye sâkinelerinden Andelib bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i mutallıkı işbu râfi‘ü’l-kitâb Ali Beşe b. Abdullah nâm kimesne mahzarında bi tav‘ihâ ikrâr-ı tâm ve takrîr-i kelâm edip bundan akdem mezbûr Ali Beşe zevcim olup talâk-ı bâyin ile beni tatlîk etmekle zimmetinde mütekarrir ve ma‘kūdun aleyh olan üç bin akçe mihr-i müeccelim ve nafaka-i iddet-i ma‘lûmem ve me’ûnet-i süknâmı mezbûr Ali Beşe’den da‘vâ ve taleb eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî vesâtet-ı muslihîn ile da‘vâ-yı mezkûremden mezbûr Ali Beşe beni bin beş yüz akçe üzerine sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr bin beş yüz akçeyi mezbûr Ali Beşe yedinden bi’t-tamâm ahz ü kabz edip mâ‘adâ da‘vâsından zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm mihr-i mezkûruma ve nafaka-i iddet ve me’ûnet-i süknâma müte‘allika mezbûr Ali Beşe ile vechen mine’l-vücûh da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâlis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Hüseyin Beşe b. Hüseyin Serdâr, el-Hâc Hüseyin b. Hasan, Emrullah b. Mehmed, Musa b. İbrahim, Muharrem b. Receb.