Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 391 Hüküm no: 522 Orijinal metin no: [78a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in ortağı Dağlı Reis ile olan davasında anlaşma sağlandığı Mellâh tâifesinden Mustafa Reis b. Mehmed nâm kimesne mahfil-i kazâda işbu hâmilü’s-sifr Dağlı Reis v. Anton nâm zimmî muvâcehesinde ikrâr ve takrîr-i kelâm edip merkūm Dağlı Reis ile mukaddemâ şerîkler olup ba‘dehû fesh-i akd-i şirket eylediğimizde asl-ı mâl ve fâideyi her birimiz ahz ü kabz eylediğimizden sonra mukaddemâ Karadeniz’de vâki‘ Çingene nâm kasaba önünde sefînemiz bi emrillâhi te‘âlâ fırtına isâbet edip pârelenmekle zikr olunan sefîneye ve âlât-ı lâzımesine ve mezbûrun zimmetinde cihet-i karzdan olan beş bin akçeye ve târih-i kitâba gelinceye değin beynimizde vâki‘ ahz ü i‘tâ ve mu‘âmelât-ı şettâya müte‘allika de‘âvîden merkūm Dağlı Reis’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Kapudân b. Musa, Mehmed Çelebi b. Abdullah, el-Hâc Yusuf b. Abdullah, el-Hâc Süleyman b. İbrahim, Mustafa Kapudân b. Murad, Osman Çelebi b. el-Hâc Yusuf ve gayruhüm.