Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 731 Hüküm no: 946 Orijinal metin no: [113a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rumeli Kazaskeri Abdurrahman Efendi’nin kızı İsmihan Hatun ile eşi Mehmed Sadi Efendi arasındaki boşanma davasında taraflara mühlet verildiği Sâbıkan Rumeli kadıaskeri olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî a‘lemü’l-ilm ve’l-hüda menârü’l-fazl ve’t-takvâ hallâlü’l-müşkilâti’d-dîniyye keşşâfü’l-mu‘dilâti’l-yakīniyye Sa‘âdetlü Abdurrahman Efendi hazretlerinin kerîme-i mükerremeleri umdetü’l-muhadderât zübdetü’l-muvakkarât İsmihan Hâtun tarafından husûs-ı âti’l-beyâna vekîl olup zâtını ma‘rifet-i şer‘iyye ile ârifân olan Hasan b. Mehmed ve Osman b. Mehmed nâm kimesneler şehâdetleriyle şer‘an vekâleti sâbite olan umdetü’l-müderrisîni’l-kirâm Mehmed Efendi b. Ahmed meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda umdetü’l-mevâli’l-izâm Mehmed Sadi Efendi b. el-merhûm Yusuf Efendi mahzarında üzerine da‘vâ ve takrîr-i kelâm edip mûmâ-ileyh Mehmed Sadi Efendi iki bin altın mehr-i müeccel ile müvekkile-i mûmâ-ileyhâyı bundan akdem tezevvüc ve duhûl ettikden sonra talâk-ı selâse ile tatlîk etmeğin suâl olunup meblağ-ı mezkûr iki bin altının müşârün-ileyh Mehmed Sadi Efendi’den alıverilmesi matlûbumdur dedikde, gıbbe’s-suâl mûmâ-ileyh Mehmed Sadi Efendi cevâbında müvekkile-i müşârün-ileyhâyı ancak bin altın müeccel ile tezevvüc ve duhûl edip müvekkile-i mûmâ-ileyhâ mehr-i mezbûreyi bana hibe, ben dahi kabûl etmiş idim deyû müdde‘î-i mezbûru ba‘zı da‘vâsında def‘le mukābele edip müvekkile-i mûmâ-ileyhâyı talâk-ı ric‘î ile tatlîk etmiş idim deyû talâk-ı selâse ile tatlîkini ve bin altın ziyâdeyi inkâr edicek müdde‘î-i mezbûrdan talâk-ı selâse ile tatlîk ve ziyâde da‘vâsı için ve mûmâ-ileyh Mehmed Sadi Efendi’den def‘-i mezbûru için beyyine taleb olundukda her biri ityân-ı beyyine için istimhâl etmekle mehl-i şer‘î ile imhâl olunmağın mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Abdurrahman Efendi [b.] Osman el-İmâm, Ahmed Efendi [b.] İbrahim, Mehmed Çavuş b. Osman el-Mübâşir, Kasım b. Mehmed, Mehmed Çelebi b. Abdullah, İbrahim Çelebi b. Ahmed.