Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 732 Hüküm no: 947 Orijinal metin no: [113a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçük yaşta vefat eden İbrahim’in terekesinin vasîsi Himmet Beşe b. Mustafa’dan alınıp vârislere verilmesi Medîne-i Üsküdar’a tâbi‘ İstavros nâm karye ahâlîsinden iken vefât eden Hüseyin Çavuş b. Ahmed’in sulbî oğlu olup bundan akdem vefât eden İbrahim nâm sagīrin verâseti vâlidesi ( ) nâm hâtuna ve li üm kız karındaşı Râbia nâm sagīreye ve li ebeveyn ammileri Derviş ve İbrahim Efendi nâm kimesnelere münhasır olduğu şer‘an sâbit oldukdan sonra sagīre-i mezbûre Râbia’nın babası ve velîsi olan bâ‘isü’l-kitâb Yusuf b. Veli nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müteveffâ-yı mezbûr İbrahim’in vasîsi olup babasından intikāl eden malını kabz eden Himmet Beşe b. Mustafa nâm kimesne mahzarında üzerine da‘vâ ve takrîr-i kelâm edip mezbûr Himmet Beşe’den mukaddem sagīr-i mezbûr İbrahim’in hayâtında vasîsi olan Sefer Ağa azl olunup mezbûr Himmet Beşe vasî nasb olundukda merkūm Himmet Beşe sagīr-i mezbûr İbrahim’in merkūm Sefer Ağa yedinde olan nakid kırk bin akçesini kabz edip hattâ meblağ-ı mezbûru vech-i muharrer üzre kabzını ikrâr dahi edip ba‘dehû sagīr-i mezbûr İbrahim fevt olup sâire verese ile mezbûr Himmet Beşe’nin muhâsebesini gördüğümüzde mezbûr Himmet Beşe sagīr-i mezbûr malından nakid ancak makbûzum yirmi iki bin akçedir deyû mâ‘adâyı kabzını inkâr etmekle yirmi iki bin akçeden sagīr-i mezbûrenin hissesini bana teslîm edip bâkī zimmetinde kalmışidi suâl olunup ihkāk-ı hak olunmak matlûbumdur dedikde gıbbe’s-suâl mezbûr Himmet Beşe vech-i muharrer üzre sagīr-i mezbûr İbrahim’in malından merkūm Sefer Ağa yedinden yirmi iki bin akçeden ziyâde on sekiz bin akçe dahi kabz ettiğini ve ba‘dehû kabzını i‘tirâf ettiğini inkâr etmeğin müdde‘î-i mezbûrdan müdde‘âsını mübeyyine beyyine taleb olundukda mahmiye-i İstanbul’da Çakır Ağa mahallesi sükkânından Musa Efendi b. Hasan, Soğan Ağa mahallesi sükkânından Hüseyin b. el-Hâc Şaban nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Himmet Beşe sagīr-i mezbûr İbrahim’in malından merkūm Sefer Ağa yedinden nakid kırk bin akçe ahz u kabz ettiğini huzûrumuzda tâyi‘an ikrâr etmişdi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı bâkī-i mezbûr on sekiz bin akçeden sagīre-i mezbûre Râbia’nın südüs hissesi olan üç bin akçeyi müdde‘î-i mezbûra edâ ve teslîme merkūm Himmet Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Abdi Çelebi b. Hüseyin, Şükrullah Bey b. Mustafa, Hasan Çelebi b. Ahmed, İbrahim Çelebi b. Mehmed.