Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 392 Hüküm no: 523 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Androni v. Kiga’nın Fâtıma Sultan Vakfına ait arsa üzerine inşa ettirdiği meyhanenin keşfi Mahmiye-i Galata’da Câmi‘-i Kebîr mahallesinde sâkin bâ‘is-i hâze’l-kitâb Androni v. Kiga nâm zimmînin husûs-ı âti’z-zikre tarafından vekîl-i müsecceli olan Mihal v. Hürmüz nâm zimmî mahfil-i kazâda mahrûsa-i İstanbul’da merhûm Fâtıma Hâtun vakfı’na bi’l-fi‘l mütevellî olan Hasan Efendi b. Mustafa mahzarında bi’l-vekâle takrîr-i kelâm ve ta‘bîr ani’l-merâm edip vakf-ı mezbûrdan olup icâre-i mu‘accele ve beher yevm yedişer akçe ücret-i müeccele ile müvekkilim merkūm Androni’nin taht-ı tasarrufunda olup mahalle-i merkūmede vâki‘ bir tarafdan Abdi Efendi tasarrufunda olan vakıf meyhâne ve bir tarafdan Asniye bt. Anton nâm nasrâniye mülkü ve bir tarafdan kilise-i Efrenc ve bir tarafdan tarîk-i âm ile mahdûd vakıf arsa-i hâliye üzerinde müvekkilim mezbûr Androni icâre-i mu‘accelesine mahsûb olmak üzre malıyla müceddeden binâ eylediği üç tabakalı meyhânenin cânib-i şer‘den üzerine varılıp ebniyesi ba‘de’l-mesâha keşf ve takvîm olunmak matlûbumdur dedikde savb-ı şer‘den umdetü’l-müderrisîni’l-kirâm Abdülgaffâr Efendi hazretleri irsâl olunup ol dahi hâssa mi‘mârlarından üstâd el-Hâc Hasan b. Ömer ile zikr olunan mahalle vardıklarında mi‘mâr-ı merkūm meyhâne-i mezbûrenin ebniyesini mütevellî-i mersûm ve zeyl-i kitâbda mastûrü’l-esâmî olan müslimîn muvâcehelerinde hayt-ı müstakīm-i rast-manzar ve takvîm-i sahîh ile mesâha eyledikde meyhâne-i merkūmenin tabaka-i süflâsında vâki‘ olan tûlen on yedi ve kadden dört bi hesâb-ı şatrancî altmış sekiz zirâ‘ taş duvarın her zirâ‘ı sekizer akçeden beş bin dört yüz kırk akçe ve bi hesâb-ı terbî‘î altmış sekizer zirâ‘ tuğladan mebnî kemerin her zirâ‘ı iki yüz yirmişer akçeden on bin beş yüz altmış akçe ve bi hesâb-ı terbî‘î altmış sekiz zirâ‘ kârgîr taş duvarın her zirâ‘ı yüz kırkar akçeden altı yüz yirmi akçe ve on iki verdenar direğinin her biri dörder yüz akçeden dört bin sekiz yüz akçe def‘a altı zirâ‘ kârgîr taş duvarın her zirâ‘ı yüz yirmişer akçeden yedi yüz yirmi akçe, iki sagīr kapı üç yüz akçe ve bir mahzen dolabı beş yüz akçe ve dört sagīr ve kebîr kapı iki bin akçe ve iki demirli pencere altı yüz akçe ve tabaka-i vustâda vâki‘ tûlen on yedi ve kadden üç, bi hesâb-ı şatrancî elli bir zirâ‘ dolma duvar ki her zirâ‘ı yetmişer akçeden üç bin beş yüz yetmiş akçe, def‘a bi hesâb-ı terbî‘î doksan zirâ‘ dolma duvarın her zirâ‘ı yetmişer akçeden altı bin üç yüz akçe, def‘a bi hesâb-ı terbî‘î otuz altı zirâ‘ dolma duvarın her zirâ‘ı yetmişer akçeden iki bin beş yüz yirmi akçe, tabaka-i vustâda dokuz aded ağaç toplu pencerelerin her biri yüz altmışar akçeden bin dört yüz kırk akçe, iki oda kapısı dört yüz akçe ve bi hesâbı terbî‘î yüz iki zirâ‘ tahta döşemenin her zirâ‘ı yetmişer akçeden yedi bin kırk akçe ve tabaka-i ulyâsında tûlen elli ve kadden altı bi hesâb-ı terbî‘î üç yüz zirâ‘ dolma duvarın her zirâ‘ı yetmişer akçeden yirmi bir bin akçe ve def‘a bi hesâb-ı terbî‘î doksan altı zirâ‘ dolma duvarın her zirâ‘ı altmışar akçeden altı bin yedi yüz yirmi akçe ve tûlen on dokuz ve arzan on yedi bi hesâb-ı terbî‘î üç yüz yirmi üç zirâ‘ tahta döşemenin her zirâ‘ı seksener akçeden yirmi beş bin sekiz yüz kırk akçe ve def‘a bi hesâbı terbî‘î doksan üç zirâ‘ tahta perdenin her zirâ‘ı yetmişer akçeden altı bin dört yüz on akçe, def‘a bi hesâbı terbî‘î otuz beş zirâ‘ tahta döşemenin her [bir] zirâ‘ı altmışar akçeden iki bin yüz akçe perdeleri ve kireç kuyuları ile kayagan döşemeli iki kenîf sekiz bin akçe ve iki dolab bin akçe, def‘a on altı zirâ‘ perdenin her zirâ‘ı kırkar akçeden altı yüz kırk akçe ve her biri yüz otuzar akçeden altı aded direk ma‘a başlık yedi yüz seksen akçe üç aded nerdübân-ı sagīr altı yüz akçe ve bir kebîr nerdübân sekiz yüz akçe, çerçevesiyle bir tahta kapı dört yüz akçe ve iki Bartın direği altmış akçe ve tûlen yirmi üç arzan on sekiz bi hesâb-ı terbî‘î dört yüz on dört zirâ‘ sakfın her zirâ‘ı yüz yirmişer akçeden kırk dokuz bin altı yüz seksen akçe ve dört bin akçe ihrâc-ı mezbele ki cem‘an bir yük doksan altı bin dört yüz akçe ile olur bundan noksan ile olmak mümkün değildir deyû mi‘mâr-ı mezbûrun haber verdiği mûmâ-ileyh efendi hazretleri ol mahalde ketb [ve] tahrîr ba‘dehû hüddâm-ı mahkeme-i şerîfeden olup kendi ile ma‘an mahall-i mezbûra irsâl olunan Âbid b. Mustafa ile meclis-i şer‘a gelip alâ vukū‘ihî inbâ ve takrîr buyurdukları ecilden mâ vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mefharü’l-eimme Yusuf Efendi b. Siyâmi el-İmâm, Ramazan Halîfe b. Siyâmi el-Müezzin, Ali Halîfe b. Abdullah, el-Hâc Süleyman b. Hüseyin, Hasan Beşe b. Musa, Mustafa b. Receb, Hüseyin b. Mirza, Ahmed Yazıcı [b.] Mehmed, Ebûbekir Beşe b. Şaban Çukadâr, el-Hâc Ramazan b. Mehmed, Hüseyin b. Abdullah.