Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 393 Hüküm no: 524 Orijinal metin no: [78b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hasan b. Mustafa’nın Mehmed b. Receb’de olan alacağının varisi Hüseyin tarafından tahsil edildiği Fi’l-asl vilâyet-i Anadolu’da vâki‘ nefs-i kasaba-i Giresun sükkânından olup ticâret üzre iken bundan akdem mahmiye-i Galata’da Sultan Bayezid mahallesinde vefât eden Hasan b. Mustafa nâm kimesnenin li ebeveyn karındaşı ve hasren vârisi olan Hüseyin nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed b. Receb nâm kimesne mahzarında ikrâr ve takrîr-i kelâm edip bundan akdem mûrisim müteveffâ-yı mezbûr Hasan merkūm Mehmed ile ticâret emrinde şerîkler olup fesh-i şirket etmezden mukaddem vefât [79a] etmekle asl-ı mâlı olan üç bin beş yüz akçe hakkı mezbûr Mehmed’in zimmetinde kalmışidi el-hâletü hâzihî meblağ-ı mezbûr üç bin beş yüz akçeyi mezbûr Mehmed’in yedinden verâsetim hasebiyle bi’t-tamâm ahz ü kabz eyledim, min ba‘d asl-ı mâl-ı mezkûrdan ve fâidesinden mezbûrun zimmetinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Ali b. Ali, es-Seyyid Osman b. Abdülcelil, Mustafa Çelebi b. Receb, el-Hâc Ramazan b. Mehmed, el-Hâc Sefer Ağa ve gayruhüm.