Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 394 Hüküm no: 525 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülüm Hâtun bt. Ali’nin evini bey‘ bi’l-istiğlâl suretiyle Emine bt. Mustafa’nın vasisine sattığı Mahmiye-i Galata hâricinde Şahkulu mahallesinde sâkine Gülüm Hâtun bt. Ali mahfil-i kazâda Emine bt. Mustafa nâm sagīrenin tesviye-i umûruna kıbel-i şer‘den mansûbe vasîsi olan râfi‘atü’l-kitâb Belkıs bt. Ahmed nâm hâtun mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan ba‘zan Hatice bt. Abdullah tasarrufunda olan vakıf menzil ve ba‘zan Değirmencizâde demekle ma‘rûf ( ) nâm kimesne mülkü ve iki tarafdan tarîk-i hâs ve bir tarafdan tarîk-i âm ile mahdûd mülk menzilimi vasiyy-i mezbûre Belkıs Hâtun’a yirmi dört bin fıddî râyic fi’l-vakt akçeye bi tarîki’l-istiğlâl bey‘ ve teslîm edip ol dahi vech-i muharrer üzre sagīre-i mezbûrenin malıyla iştirâ ve tesellüm ve kabûl eyledikden sonra semeni olan meblağ-ı mezbûru vasiyy-i mezbûre Belkıs yedinden bi’t-tamâm ahz ü kabz eyledikden sonra yine menzil-i mezbûru ba‘de’t-tahliyyet [ve’t]-tekābuz târih-i kitâbdan bir sene tamâmına değin üç bin altı yüz akçe ücret ile mezbûre Belkıs Hâtun bana îcâr etmekle ben dahi ücret-i merkūme ile istîcâr eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Fahrü’l-müderrisîn Mehmed Efendi b. Mustafa el-Müderris, Sâlih Çelebi b. Yusuf, Yusuf Beşe b. Abdullah, Abdi Çelebi b. Ali, Hamza b. Abdülganî, Muharrem b. Receb, fahrü’l-a‘yân Ali Ağa b. Yusuf, Ahmed Çelebi b. Mustafa, Mehmed Beşe b. Ahmed, Ebûbekir Beşe b. Şaban Çukadâr, Mahmud Beşe b. Ahmed ve gayruhüm.