Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 394 Hüküm no: 526 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fenine bt. Dimitri’nin, evini Aleksandri v. Diti’ye sattığı Mahrûsa-i Galata müzâfâtından nâhiye-i Marmara’ya tâbi‘ Aftun nâm karyede sâkine Fenine bt. Dimitri nâm nasrâniye mahfil-i kazâda işbu hâmilü’s-sifr Aleksandri v. Diti nâm zimmî muvâcehesinde bi tav‘ihâ ikrâr ve takrîr-i kelâm edip silk-i mülkümde münselik olup karye-i merkūmede vâki‘ bir tarafdan İstefoli nâm zimmî mülkü ve bir tarafdan Avramilyoni nâm zimmî mülkü ve bir tarafdan Kordiyo Papa Liyos nâm zimmî mülkü ve bir tarafdan sâhil-i bahr ile mahdûd bir bâb fevkānî ve bir bâb tahtânî odaları müştemil mülk menzilimi cümle tevâbi‘ ve levâhıkı ile merkūm Aleksandri’ye dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘, ol dahi vech-i muharrer üzre iştirâ ve kabûl eyledikden sonra semeni olan meblağ-ı merkūm mezbûr Aleksandri yedinden bi’t-tamâm ve’l-kemâl ahz ü kabz eyledim, ba‘de’l-yevm menzil-i mahdûd-ı mezkûr merkūm Aleksandri’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Ramazan b. Ahmed, Hamza b. Abdülganî, Mustafa b. Receb, Âbid b. Mustafa, Ahmed Yazıcı b. Mehmed ve gayruhüm.