Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 395 Hüküm no: 527 Orijinal metin no: [79a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Nazar v. Kaytan’ın, Panayot’un arsası üzerinde inşa ettiği duvarın yıkılması Husûs-ı âti’l-beyânın mahallinde istimâ’ı tahrîr [ve] iltimâs olunmağın savb-ı şer‘den umdetü’l-müderrisîni’l-kirâm Abdülgaffâr Efendi hazretleri irsâl olunup ol dahi hâssa mi‘mârlarından üstâd Ali b. Abdullah ile mahmiye-i Galata dâhilinde Sultan Bayezid mahallesinde sâkin Panayot v. Rizo nâm zimmînin mülk menziline varıp zeyl-i kitâbda mastûrü’l-esâmî olan müslimîn ile akd-i meclis-i şer‘-i şerîf eyledikde râfi‘-i hâze’l-kitâb mezbûr Panayot meclis-i ma‘kūd-ı mezkûrda câr-ı mülâsıkı olan Nazar v. Kaytan nâm Ermeni muvâcehesinde üzerine da‘vâ ve takrîr-i kelâm edip bin yetmiş târihi senesinde mahmiye-i merkūmede vâki‘ olan harîkden mukaddem arsa-i merkūme üzerinde olan menzilimin direkleri altında olup hâlâ arsamın hudûdu dâhilinde olan mülk temel taşlarımın üzerine bi gayri hakkın ve merkūm Nazar menzilinin taş duvarın binâ eylemişdir, vâki‘ hâl ahâlî-i mahalle-i merkūmeden istihbâr olundukda hakīkaten hâl ahâlî-i mahalle-i mezbûreden olup hâzırûn bi’l-meclis olan Trandafilo v. Duka nâm zimmî ve Duka v. Anastaş v. Siyoflu ve Yani v. Yorgi ve Yorgi v. Yani nâm zimmîlerden istihbâr olundukda fi’l-vâki‘ târih-i merkūmda mahmiye-i mezbûrede vâki‘ olan harîkden mukaddem mezbûr Panayot’un işbu akd-i meclis olunan arsasında olan menzilin direkleri altında olup hâlâ arsasının hudûdu dâhilinde olup merkūm Nazar üzerine taş duvar binâ eyleyip mu‘âyene ve müşâhede olunan temel taşları müdde‘î-i merkūm Panayot’un mülküdür deyû vâki‘ hâli her biri alâ tarîki’ş-şehâde [79b] [haber] verdiğin mi‘mâr-ı merkūm mesâha eyledikde zikr olunan temel taşları üzerinde merkūm [Nazar b.] Kaytan’ın bi gayri hakkın binâ eylediği taş duvar nısf zirâ‘a bâliğ olduğunu mûmâ-ileyh efendi hazretleri ol mahalde ketb ve tahrîr, ba‘dehû hüddâm-ı mahkemeden kendi ile ma‘an irsâl olunan Mustafa Çelebi b. Receb ile meclis-i şer‘a gelip alâ vukū‘ihî inhâ ve takrîr etmeğin sâlifü’z-zikr temel taşları üzerinde müte‘addiyen binâ eylediği nısf zirâ‘ duvarını ref‘a merkūm Nazar Ermeni’ye tenbîh birle mâ vaka‘a bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene erba‘ ve seb‘în ve elf. Şuhûdü’l-hâl: El-Hâc Sefer b. Fazlı, Mehmed Beşe b. Osman, es-Seyyid Süleyman Çelebi b. İbrahim, Hasan b. Abdullah, Ahmed Yazıcı b. Mehmed ve gayruhüm.