Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 396 Hüküm no: 528 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cenane bt. Abdullah’a ev bedelinden olan borcunu ödemesi hususunda Sâliha bt. Mehmed’e tenbihte bulunulduğu Mahmiye-i Galata müzâfâtından kasaba-i Kasımpaşa’da Küçük Piyâle Paşa mahallesinde sâkine râfi‘atü hâze’l-kitâb Cenâne bt. Abdullah nâm hâtun meclis-i şer‘-i hatîr-i lâzımü’t-tevkīrde mahalle-i mezbûrede sâkine Sâliha bt. Mehmed nâm hâtun mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan İsmail Bey b. Abdullah mülkü ve bir tarafdan yine mezbûre Sâliha Hâtun mülkü ve bir tarafdan tarîk-i hâs ve bir tarafdan tarîk-i âm ile mahdûd bir bâb tahtânî oda ve bir sofa ve kenîfi ve bahçeyi müştemil olan menzili târih-i kitâbdan beş ay mukaddem mezbûre Sâliha Hâtun’a fıddî râyic fi’l-vakt on iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûrun bin akçesini yedinden mukaddemâ ahz ü kabz edip on bir bin akçe hakkım zimmetinde kalmışidi. Hattâ menzil-i mezbûru minvâl-i muharrer üzre semen-i merkūma benden iştirâsını alâ ruûsi’l-işhâd ikrâr ve i‘tirâf dahi etmişdir hâlâ meblağ-ı bâkī on bir bin akçeyi mezbûre Sâliha Hâtun’dan taleb ederim, suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i müslimînden olup mahalle-i mezbûre sükkânından Osman Halîfe b. Abdullah ve Piyâle Paşa-yı kebîr mahallesinde sâkin Mehmed Çelebi b. Mehmed nâm kimesne li ecli’ş-şehâde meclis-i şer‘a hâzırân olup isre’l-istişhâd fi’l-hakīka târih-i mezbûrda mezbûre Sâliha Hâtun zikr olunan menzili müdde‘iye-i mezbûre Cenâne Hâtun’dan on iki bin akçeye iştirâ ve kabûl eyledim deyû bizim huzûrumuzda ikrâr ve i‘tirâf edip bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle meblağ-ı bâkī on bir bin akçeyi müdde‘iye-i mezbûre Cenâne Hâtun’a edâ ve teslîme mezbûre Sâliha Hâtun’a tenbîh birle mâ vaka‘a bi’t-taleb ketb olundu. Hurrire fi’l-yevmi’r-râbi‘ aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Hüseyin Efendi b. Mustafa, Eyüb Ağa, Mehmed b. Osman, Mustafa b. Receb, Ahmed Yazıcı b. Mehmed.