Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 397 Hüküm no: 529 Orijinal metin no: [79b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marola ve Kanaki’nin, Nikola v. Dimitri’den intikal eden evlerini müzayede ile Durmuş v. Petro’ya sattıkları Mahmiye-i Galata dâhilinde Sultan Bayezid mahallesinde sâkin iken bundan akdem hâlik olan Nikola v. Dimitri nâm zimmînin verâseti zevce-i metrûkesi Marola bt. ( ) nâm nasrâniyeye ve sulbî oğlu Kanaki nâm sagīre münhasıra olduğu şer‘an zâhir [ve] müte‘ayyin oldukdan sonra mezbûre Marola asâleten ve sagīr-i mezbûrun tesviye-i umûruna kıbel-i şer‘den mansûbe vasîsi olmağla vesâyeten meclis-i şer‘-i hatîr-i lâzımü’t-tevkīrde işbu bâ‘isü’s-sifr Durmuş v. Petro nâm zimmî muvâcehesinde bi’l-asâle ve bi’l-vesâye ikrâr ve takrîr-i kelâm edip hâlik-i mezbûrun muhallefâtından olup mahalle-i mezbûrede vâki‘ bir tarafdan Duka v. ( ) nâm zimmî mülkü ve bir tarafdan merhûm Kasımpaşa vakfı ve bir tarafdan mîrî değirmen ve bir tarafdan tarîk-i âm ile mahdûd fevkānî iki bâb odalar ve bir tahta-pûş ve tahtânî bir mahzen ve bir kenîf ve bir su kuyusunu müştemil mülk menzil hâlik-i mezbûrun zarûret-i deyni için şer‘an bey‘i lâzım gelmekle menzil-i mezbûru dellâle verip sûk-i sultânîde kirâren ve mirâren nidâ ve müzâyede ettirip rağabât-ı nâs bi’l-külliyye münkatı‘a oldukdan sonra merkūm Durmuş üzerinde yirmi bin akçede karâr edip ziyâde ile tâlib-i âhar olmayıp meblağ-ı merkūm menzil-i mezbûrun semen-i misli olduğunu zeyl-i kitâbda mastûrü’l-esâmî müslimîn dahi ihbâr eylediklerinde asâlet ve vesâyetim hasebiyle menzil-i mârrü’z-zikri merkūm Durmuş’a yirmi bin fıddî ve râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı merkūm yirmi bin akçeyi mezbûr Durmuş yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr merkūm Durmuş’un mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, el-Hâc Ramazan b. Mehmed, Sefer Beşe b. Yusuf, Ahmed Yazıcı b. Mehmed, Siyavuş b. Abdullah ve gayruhüm.