Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 397 Hüküm no: 530 Orijinal metin no: [79b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Çelebi b. Halil’in, Mavri v. Pandeli’de balık bedelinden olan alacak davasında sulh sağlandığı Vilâyet-i Rumeli’nde vâki‘ kasaba-i Kili sükkânından Osman Çelebi b. Halil tarafından meblağ-ı câi’z-zikri sulh [ve] ibrâya vekîl olup Ömer Reis b. Ahmed ve el-Hâc Mehmed b. Ali nâm kimesneler şehâdetleri ile şer‘an vekâleti sâbite olan Mehmed Çelebi b. İsmail nâm kimesne meclis-i şer‘-i hatîr-i lâzımü’t-tevkīrde bâ‘is-i hâze’r-rakīm Mari v. Pandeli nâm zimmî muvâcehesinde bi’l-vekâle ikrâr ve takrîr-i kelâm [80a] edip bundan akdem mezbûr Mari zimmetinde müvekkilim mezbûr Osman Çelebi’nin beynlerinde ma‘lûm balık bahâsından altmış bin beş yüz akçe hakkı olup meblağ-ı mezbûru vekâletim hasebiyle mezbûr Mari’den taleb ve da‘vâ eylediğimde beynimizde münâza‘ât-ı kesîre vâkı‘a olmuşidi el-hâletü hâzihî meblağ-ı mezbûr altmış bin beş yüz akçe da‘vâsından mezbûr Mari ile beni yirmi yedi bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi yedi bin akçeyi mezbûr Mari yedinden alıp kabz edip, meblağ-ı bâkī da‘vâsından mezbûr Mari’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: İbrahim Reis b. Abdullah, el-Hâc Ali b. el-Hâc Sâdık, el-Hâc Mustafa b. Mehmed, el-Hâc Ali b. Musa, Mehmed Ağa b. Bayram ve gayruhüm.