Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 398 Hüküm no: 531 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Mustafa’ya kefaletden dolayı olan borcunu ödemesi hususunda Yorgi v. Drako’ya tenbihte bulunulduğu Merhûme Fâtıma Hâtun evkāfının kāimmakām-ı mütevellîsi olan işbu râfi‘ü’l-kitâb Hasan Efendi b. Mustafa nâm kimesne mahfil-i kazâda Yorgi v. Drako nâm zimmî muvâcehesinde üzerine da‘vâ ve takrîr-i kelâm edip evkāf-ı mezbûrdan olup gāibe-i ani’l-meclis Maryora nâm nasrâniyenin icâre-i mu‘accele ve ücret-i müeccele-i ma‘lûme ile tasarrufunda olup mahrûsa-i Galata’da Sultan Bayezid mahallesinde vâki‘ lede’l-ahâlî ve’l-cîrân ma‘lûmü’l-hudûd muhterik menzil arsası ücretinden ba‘de külli hesâb merkūme Maryora zimmetinde vakf-ı mezbûrun iki bin akçe hakkı zuhûr etmekle meblağ-ı mezbûru merkūmeden taleb eylediğimde mezbûr Yorgi meblağ-ı merkūme tarafeynden emr ve kabûlü hâviye kefâlet-i sahîha-i şer‘iyye ile kefîl olmuşidi el-hâletü hâzihî meblağ-ı mezbûru kefâleti hasebiyle mezbûrdan taleb ederim, suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Hüseyin b. Süleyman ve Ramazan b. Siyâmi nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Maryora zimmetinde zikr olunan muhterik menzil arsası ücretinden olan iki bin akçe[ye] vech-i muharrer üzre merkūm Yorgi bizim huzûrumuzda kefîl bi’l-mâl oldu, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûl olmağın mûcebiyle meblağ-ı mezbûru mütevellî-i merkūma edâya kefîl-i mezbûr Yorgi’ye tenbîh birle mâ vaka‘a bi’t-taleb ketb olundu. Hurrire fi’l-yevmi’l-âşir mine’l-Muharremi’l-harâm li sene 1074. Şuhûdü’l-hâl: Mustafa b. Receb, el-Hâc Ramazan b. Mehmed, el-Hâc Fazlı, Ahmed b. Mehmed.