Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 399 Hüküm no: 532 Orijinal metin no: [80a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Kapudânın gemisinde yazıcı olan Siyavuş’un navlun bahasından topladığı paranın bir kısmını teslim etmediği iddiasını ispatlayamadığı Sefîne kapudânlarından Hüseyin Kapudân b. Elvan Kapudân nâm kimesne mahfil-i kazâda işbu râfi‘ü’l-kitâb Siyavuş b. Abdullah mahzarında üzerine da‘vâ ve takrîr-i kelâm edip merkūm Siyavuş sefînemde yazıcı olmağla bundan akdem İstanbul’dan medîne-i Mısr-ı Kahire’ye karîb Reşid nâm kasaba iskelesine sefer edip iskele-i merkūmede sefîne-i mezbûreye navul ile tahmîl olunan emti‘a-i mütenevvi‘a ile İstanbul’a geldiğimizde emti‘a-i mezbûre ashâbı zimmetlerinde navuldan olan iki bin iki yüz kıt‘a esedî guruşun dört yüz esedî guruşunu metâ‘ sâhiblerinden ben ahz ü kabz edip bâkī bin sekiz yüz kıt‘a merkūmü’l-vasf guruşunu merkūm Siyavuş kabz etmekle mukaddemâ bin sekiz yüz guruşun bin dört yüz otuz guruşunu mezbûr Siyavuş yedinden ahz ü kabz edip üç yüz yetmiş guruşu yedinde bâkī kalmağın hâlâ taleb ederim, suâl olunsun dedikde gıbbe’s-suâl merkūm Siyavuş cevâbında navuldan makbûzum olup müdde‘î-i mezbûre bundan esbak def‘ ve teslîm etmekle ol dahi kabzına mu‘terif olduğu bin dört yüz otuz guruşdan mâ‘adâ navl-ı sefîne-i mezbûreden bir akçe ve bir habbe kabz etmedim deyû üç yüz yetmiş guruş ziyâde kabzını münkir olucak müdde‘î-i merkūmdan ziyâdeyi mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i merkūma teslîm eylediği iki bin dört yüz otuz guruşdan gayrı navuldan bir akçe ve bir habbe ahz ü kabz etmediğine mezbûr Siyavuş’a yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i merkūm mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâdî aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Ebûbekir Beşe Çukadâr, Mehmed b. Abdullah, el-Hâc Sefer b. Musli, Ahmed Yazıcı b. Ahmed, Mustafa b. Receb.