Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 733 Hüküm no: 948 Orijinal metin no: [113a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın vasiyeti için Veli Bey b. Mahmud’u vasî tayin ettiği Mahmiye-i İstanbul’da Küçük Ayasofya mahallesinde sâkine Âişe bt. Abdullah nâm hâtun tarafından husûs-ı âtîye vekîl olduğu zât-ı merkūmeyi ma‘rifet-i şer‘iyye ile ârifân olan Mehmed Beşe b. Abdullah ve diğer Mehmed b. Kemal nâm kimesneler şehâdetleri ile şer‘an sâbit olan Abdülkerim b. Mirza nâm kimesne meclis-i şer‘-i şerîf-i lâzımü’t-teşrîfde bi’l-vekâle ikrâr ve takrîr-i kelâm edip müvekkilem mezbûre Âişe Hâtun vaktâ ki dâr-ı dünyâdan sarây-ı ukbâya intikāl eylediğimde eşyâ-i memlûkemden bir sîm kemer kuşak ve on üç miskāl bir altın bilezik ve bir çift incili küpe ve bir münakkaş çuka ferâcem semen-i misilleri ile bey‘ olunup hâsıl olan meblağın sekiz yüz akçesine bir kefen ve bin akçesi ile iskāt-ı salât ve bâkī ne mikdâr akçe kalırsa eyyâm-ı mu‘tâdede ta‘âm tabh oluna deyû vasiyyet edip ve bu vasiyyeti tenfîze işbu hâzır bi’l-meclis Veli Bey b. Mahmud nâm kimesneyi vasiyy-i muhtâr nasb ve ta‘yîni ihtiyâr eyledi dedikde ol dahi vesâyet-i lâzımesini kemâ yenbağī edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Efendi b. Kemal el-Müezzin, el-Hâc Hüseyin b. Numan, Mustafa b. Mehmed, Mehmed b. Abdullah, Ahmed b. Ömer.