Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 399 Hüküm no: 533 Orijinal metin no: [80a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Bedav’ın Efraim v. Haim’e olan borcunu taksitlendirdiği Mahrûsa-i İstanbul’da sâkin Kalaven cemâ‘atinden Yasef v. Bedav nâm yahudi meclis-i şer‘-i hatîr-i lâzımü’t-tevkīrde işbu râfi‘ü’s-sifr Efraim v. Haim nâm yahudi muvâcehesinde ikrâr ve takrîr-i kelâm edip mezbûr Efraim’e cihet-i deyn-i şer‘îden bin dokuz yüz akçe zimmetimde deynim olup lâkin meblağ-ı mezbûru def‘aten edâya iktidârım olmayıp taksîte tâlib olduğumda târih-i kitâbdan her otuz gün tamâmında seksener akçe verip yedi yüz yirmi gün tamâmına değin bi’l-cümle meblağ-ı mezbûr bin dokuz yüz akçeyi kendiye edâ ve îfâ etmek üzre mezbûr Efraim üzerime taksît ve te’cîl etmekle ben dahi taksît-i mezbûru kabûl eyledim dedikde mukırr-ı mezbûrun minvâl-i muharrer üzre cârî ve sâdır olan ikrârını el-mukarrun lehü’l-mezbûr Efraim vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâdis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, Eyüb Ağa Muhzırbaşı, Mahmud Çelebi b. Mustafa, Âbid b. Mustafa, Muharrem b. Receb ve gayruhüm.