Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 66 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, merhum Ali Beşe’deki alacağının varislerden tahsilini talep ettiği İşbu bâ‘isüˈl-vesîka Hasan b. Abdullah meclis-i şer‘-i şerîfde mahmiye-i Galata muzâfâtından Kasaba-i Kasımpaşaˈda Yeldeğirmeni mahallesinden olup vilâyet-i Rumeliˈnde kasaba-i Kiliˈde ticâret üzre iken vefât eden Ali Beşe b. Hacıˈnın verâseti zevce-i metrûkesi Havva bt. el-Hâc Hüseyin ile anası Sâliha bt. Aliˈye ve sülbî sagīr oğlu Mehmedˈe münhasıra olduğu şer‘an zâhir ve müte‘ayyin oldukdan sonra sagīr-i mezbûrun tesviye-i umûruna kıbel-i şer‘den mansûb vasîsi olan ceddi merkūmel-Hâc Hüseyin mahzarında üzerine da‘vâ ve takrîr-i kelâm edip müteveffâ-yı mezbûr hayâtında ikrâz ve tesellüm eylediği otuz dört esedî guruş hakkım kableˈl-istifâ vefât edip husûsuyla meblağ-ı mezbûr bana zimmetinde deyni olduğu alâ-ruûsiˈl-işhâd ikrâr ve işhâd dahi itmekle hâlâ vasî-i mezbûrun vâzi‘uˈl-yed olduğu tereke-i müteveffâ-yı mezbûrdan taleb ederim suâl olunsun dedikde gıbbeˈs-suâl vasî-i mezbûr cevâbında tereke-i mezkûreye vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda yine mahalle-i mezbûrede sâkin İbrahim b. İlyas ve Mehmed Beşe b. Hasan nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında müdde‘î-i mezbûre cihet-i karzdan otuz dört esedî guruş zimmetimde deynim vardır deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle olmağın müdde‘î-i mezbûre ba‘deˈt-tahlîf mûcebiyle hükm birle mâ vaka‘a biˈt-taleb ketb olundu. Fiˈl-yevmiˈs-sânî min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mustafa Ağa b. Mahmud Seroda sâbıkā, Hasan Beşe b. Ali Seroda sâbıkā, el-Hâc Mustafa b. Ali, el-Hâc Mehmed b. Habib, Mehmed Beşe b. Hasan, Ahmed Çelebi b. Emîrza