Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 67 Hüküm no: 6 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Beşe’nin terekesinin tahsili ve varislere teslimine vasî tayin edilen Hüseyin’in, Mehmed Çelebi’den terekeyi tahsil eylediği Mahmiye-i Galata muzâfâtından kasaba-i Kasımpaşaˈda Yeldeğirmeni mahallesinden olup vilâyet-i Rumeliˈnde kasaba-i Kiliˈde ticâret üzre iken bundan akdem vefât eden Ali Beşe b. Hacıˈnın verâseti zevce-i metrûkesi Havva bt. el-Hâc Hüseyin ile vâlidesi Sâliha bt. Aliˈye ve sulbî sagīr oğlu Aliˈye münhasır olduğu şer‘an zâhir ve müte‘ayyin oldukdan sonra sagīr-i mezbûrun tesviye-i umûruna min-kıbeliˈş-şer‘iˈl-mergūb mansûb vasîsi ve merkūmetân Havva ve Sâliha taraflarından zikri câ’î husûsu ikrâra vekîlleri olup Hızır Beşe b. Oruç ve Rasûl Beşe b. Mehmed şehâdetleriyle şer‘an vekâleti sâbite olan el-Hâc Hüseyin b. Ali meclis-i şer‘-i hatîrde zikri âtî terekeye vâzi‘uˈl-yed olan bâ‘isüˈl-vesîka Mehmed Çelebi b. Hüseyin mahzarında vesâyeten ve vekâleten ikrâr ve takrîr-i kelâm edip müteveffâ-yı mezbûr hayatında zikrolunan Kili kasabasında mezbûr Mehmed Çelebiˈyi bi-emrillâhi te‘âlâ vefâtından sonra terekeyi kabz ve vereseye îsâl eyle deyü vasî-i muhtâr nasb ve ta‘yîn olduğu ba‘deˈl-kabûl vefât edip terekesini [2b] ma‘rifet-i şer‘le Kili kasabasında semen-i misillerine bey‘ ve semenlerinden techîz ve tekfîn vesâir mesârif-i lâzımesine harc ü sarfdan sonra yedinde bâkī kalan ber-mûceb-i defter-i kassâm seksen dört buçuk esedî guruşu merkūm Mehmed Çelebi biˈl-vesâye getirip bana teslîm etmekle ben dahi vesâyeten ve vekâleten meblağ-ı mezbûru mezkûr Mehmed Çelebi yedinden biˈt-tamam veˈl-kemâl alıp kabz eyledim min-ba‘d müteveffâ-yı mezbûrun terekesine müte‘allik merkūm Mehmed Çelebi yedinde bir akçe ve bir habbe bâkī kalmadı dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mâ-sebak