Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 78 Hüküm no: 15 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Yazıcı’nın Musa’daki emanet ve alacaklarının vasî Receb tarafından teslim alındığı Mahrûse-i Galata muzâfâtından kasaba-i Tophâneˈ[den] Tomtom mahallesi sükkânından olup İsmail nâm mahâlde bundan mukaddem vefât eden Mehmed Yazıcı b. Yunusˈun verâseti zevce-i metrûkesi Ümmühani bt. Yusuf nâm hatuna ve sulbî sagīr oğulları Abdullah ve Ahmedˈe münhasıra olduğu şer‘an zâhir ve müte‘ayyin oldukdan sonra mezbûre Ümmühani asâleten ve sagīrân-ı mezbûrânın tesviye-i emirlerine cânib-i şer‘den mansûb vasîleri olan el-Hâc Receb b. Sinan vesâyeten meclis-i şer‘-i hatîrde râfi‘-i hâzeˈl-kitâb el-Hâc Musa b. el-Hâc Hasan mahzarında ikrâr ve i‘tirâf edip mûrisimiz müteveffâ-yı mezbûrun hayatında işbu el-Hâc Musa yedine alâ-tarîkıˈl-emâne vaz‘ ve teslîm eylediği bin sekiz yüz otuz hurde sahîhüˈl-ayar akçe ve Benez? ta‘bîr olunur sekiz yüz otuz sekiz ikilik ve otuz üç sîm yafte ve bir sîm ön kuşak ve tek altın cebe ta‘bîr olunur bileziği ve yüz doksan üç babka ve iki yüz doksan üç beşlik ve bir riyâlî ba‘de vefâtihî biˈl-verâse bize isâbet ve intikāl etmekle birimize eşyâ-i mevzûʻa-i mesfûreyi asâlaten ve vekâleten bi-kadri’l-hısas mezbûr el-Hâc Musa yedinden tamamen ahz ü kabz eyledik min-ba‘d eşyâ-i mezbûreden yedinde bir şey kalmadı dediklerinde mâ vaka‘a biˈt-taleb ketb olundu. Fî-evâsıt-ı şehr-i Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mâ-sebak