Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 79 Hüküm no: 16 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa’nın, Mehmed Yazıcı’daki alacağını vasî Receb’ten talep ettiği Mahrûse-i Galata a‘mâlinden kasaba-i Tophâneˈde Karabaş mahallesi sükkânından râfi‘-i hâzeˈl-kitâb el-Hâc Musa b. el-Hâc Hasan meclis-i şer‘-i hatîr-i lâzımüˈt-tevkīrde merhûm Mehmed Yazıcıˈnın sulbî sagīr oğulları Abdullah ve Ahmedˈin tesviye-i emirlerine kıbel-i şerî‘at-i mergūbeden mansûb vasîleri olan el-Hâc Receb b. Sinan mahzarında üzerine da‘vâ ve takrîr edip müteveffâ-yı mezbûr zimmetinde cihet-i deyn-i şer‘îden yüz esedî guruş hakkım olup hâlâ meblağ-ı mezbûr vech-i meşrûh üzre bana deyni olduğunu hayatında ikrâr ve işhâd dahi edip kableˈl-edâ fevt olmağla hâlâ taleb ederin suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden olup Tomtom mahallesi sâkinlerinden el-Hâc Mustafa b. İbrahim ve Ahmed b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr Mehmed Yazıcı hâl-i hayatında ve kemâl-i akl u sıhhatinde cihet-i deyn-i şer‘îden işbu müdde‘î-i mezbûr el-Hâc Musaˈda yüz kıt‘a esedî guruş zimmetimde vâcibüˈl-edâ deynim vardır deyü huzûrumuzda ikrâr ve bizi işhâd eyledi biz bu husûsa bu vech üzre şâhidiz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâyitiˈl-kabûl şehâdetleri makbûle olmağın gıbbeˈt-tahlîfiˈş-şer‘î mûcebiyle ba‘deˈl-hükm mâ vaka‘a biˈt-taleb ketb olundu. Fî-evâsıt-ı şehr-i Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mâ-sebak