Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 92 Hüküm no: 27 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın, merhum Hasan Çelebi’nin vekili olarak tahsil ettiği alacakları varislere teslim ettiği Mahrûse-i Galata muzâfâtından kasaba-i Tophâneˈde el-Hâc Memi mahallesinde sâkin iken bundan akdem vefât eden es-Seyyid Hüseyin Çelebi b. es-Seyyid Mehmedˈin sulbî sagīr oğulları es-Seyyid Hasan Çelebi ve es-Seyyid Mustafa Çelebiˈnin tesviye-i emirlerine kıbel-i şer‘den mansûb vasîleri ve kebîr oğlu es-Seyyid Mehmed Çelebiˈnin dahi husûs-ı câ’îye vekîli olup el-Hâc Hüseyin Efendi el-imâm ve Mehmed Bey b. Sefer şehâdetleriyle şer‘an vekâleti sâbite olan hâleteleri Şerife Rahime Hatun bt. es-Seyyid Hasan Çelebi meclis-i şer‘-i kavîm-i vâcibüˈt-ta‘zîmde işbu hâmil-i hâzeˈl-kitâb iftihârüˈs-sâdât es-Seyyid Mustafa Ağa b. Mehmed mahzarında vekâleten ve vesâyeten ikrâr ve takrîr-i kelâm edip müteveffâ-yı mezbûrun vilâyet-i Anadoluˈda Gemlik kasabasında ba‘zı zimem-i nâsda hukūk-ı ma‘lûmesi olup hayatında tahsîl içün tarafından mûmâ-ileyh es-Seyyid Mustafa Ağaˈyı vekîl edip ol dahi ba‘deˈl-kabûliˈl-vekâle kasaba-i mezbûreye varıp dört yüz yirmi esedî guruş tahsîl ve kabz etmekle hâlâ ben dahi vesâyeten ve vekâleten meblağ-ı mezbûru müşârün-ileyh es-Seyyid Mustafa Ağa yedinden biˈt-tamam veˈl-kemâl ahz u kabz eyledim min-ba‘d müteveffâ-yı merkūmun vekîli mûmâ-ileyh yedinde bir habbe bâkī kalmadı dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈs-sânî-i aşer mineˈl-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak