Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 93 Hüküm no: 30 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kalafat Hasan Beşe’nin büyük kızı Şâkire’ye hayatta iken hibe ettiği mallara vasînin dahlinin men edilmesi Mahrûse-i Galata muzâfâtından Tophâneˈde Cihangir mahallesinde [sâkin] iken bundan akdem vefât eden Kalafat Hasan Beşe b. Abdullahˈın verâseti zevceteyn-i metrûketeyn Fatma bt. Himmet ve Şâkire bt. Abdullah nâm hatunla ve kebîre kızı Emetullah ile sagīr oğlu Hüseyin ve sagīre kızı Fatmaˈya münhasıra olduğu şer‘an zâhir ve müte‘ayyin oldukdan sonra bâ‘isetüˈl-vesîka mezbûre Emetullah meclis-i şer‘de sagīrân-ı mezbûrânın tesviye-i emirlerine kıbel-i şer‘den mansûb vasîleri olan vâlideleri mezbûre Şâkire mahzarında üzerine da‘vâ ve takrîr-i kelâm babam müteveffâ-yı mezbûr hayatında eşyâ-i memlûkesinden yedimde olan defter nâtık olduğu üzre eşyâsını huzûr-ı Müslimînˈde bana hîbe ve teslîm ve ben dahi meclis-i hîbede ittihâb ve kabz edip benim mülk-i mevhûbum olmuş iken hâlâ mezbûre Şâkire tereke-i müteveffâ-yı merkūme idhâl murâd eder suâl olunsun dedikde gıbbeˈs-suâl veˈl-inkâr mezbûr Emetullahˈdan müdde‘âsına beyyine taleb olundukda mahalle-i mezbûre imâmı olan Esad Efendi b. Hasan Efendi ve Receb Bey b. Abdullah ve Abdi Beşe b. Ramazan nâm kimesneler li-ecliˈş-şehâde meclis-i şer‘a hâzırân olup isreˈl-işhâd fiˈl-hakīka müteveffâ-yı mezbûr hayatında merkūme Emetullah yedinde olan defter nâtık olduğu üzre eşyâ-i memlûkesini bizim huzûrumuzda hîbe ve teslîm ol dahi meclis-i hîbede ittihâb ve tesellüm eyledi biz bu husûsa şâhidleriz şehâdet dahi ederiz her biri edâ-i şehâdet-i şer‘iye eylediklerinde isre-ri‘âyeti şerâ’itiˈl-kabûl şehâdetleri makbûle oldukdan sonra mûcebiyle merkūme Şâkire bî-vech ta‘arruzdan men‘ birle mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak