Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 94 Hüküm no: 32 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Ağa’nın, Ebubekir Beşe’deki alacağının vasî tarafından tahsil edildiği Medîne-i Hazret-i Ebâ Eyyûbeˈl-Ensârî mahallâtından Baba Haydar mahallesinde sâkin iken bundan akdem vefât eden Ahmed Ağa b. Kurdˈun sulbî sagīr oğulları Mehmed ve Murad ve Süleyman ve Şit ve Mustafa ve İbrahimˈin tesviye-i emirlerine savb-ı şer‘den mansûb vasîleri olan Salih Çelebi b. Murad ile kebîre kızları Hamide ve Râziyeˈnin tarafından dahi ikrâr-ı âtîye vekîl olup mezbûrânın zâtlarını ma‘rifet-i şer‘iye ile ârifân olan İbrahim Çelebi b. İbrahim ve Mirza Bey b. Abdullah şehâdetleri şer‘an vekâleti sâbite olan Mehmed Efendi b. Ömer meclis-i şer‘de bâ‘isüˈl-vesîka Ebûbekir Beşe b. Ahmed mahzarında vesâyeten ve vekâleten ikrâr ve takrîr-i kelâm edip müteveffâ-yı mezbûrun hazır biˈl-meclis es-Seyyid Ali Çelebi b. es-Seyyid Hasan zimmetinde deyn-i şer‘den on yedi bin yüz akçe asıl ve üç bin akçe fâide ki cem‘an yirmi bin yüz akçe hakkını mezbûr Ahmed Ağa hayatında mezkûr es-Seyyid Ali Çelebi yedinden alıp merkūm Ebûbekir Beşeˈye îdâ‘ ve teslîm ol dahi kabz ve tesellüm edip mezkûr Ebûbekir Beşeˈden meblağ-ı mezbûr kableˈl-ahz mezbûr Ahmed Ağa fevt olup verese-i mezkûrûna isâbet etmekle hâlâ her birimiz vesâyeten ve vekâleten ve meblağ-ı mezbûr yirmi bin yüz akçeyi merkūm Ebûbekir Beşe yedinden tamamen alıp kabz eyledik meblağ-ı mezbûrdan merkūmân zimmetinde bir akçe bâkī kalmadı dediklerinde gıbbeˈt-tasdîk mâ vaka‘a biˈt-taleb ketb olundu. Fiˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mâ-sebak