Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 736 Hüküm no: 952 Orijinal metin no: [113b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hasan’ın, Mehmed Bey b. Halil’den aldığı atın kusurlu olduğunu bilerek satın aldığı Mahmiye-i İstanbul’da Haseki Hamamı kurbunda sâkin bâ‘isü’l-kitâb Mehmed Bey b. Hasan nâm kimesne meclis-i şer‘-i şerîfde diğer Mehmed Bey b. Halil nâm kimesne mahzarında üzerine da‘vâ ve takrîr-i kelâm edip mezbûr diğer Mehmed Bey işbu demir karayağız atı yedinde mülkü olduğu hâlde târih-i kitâb senesi Cumâdelâhiresi’nin onuncu günü uyûbdan sâlim olmak üzre bana yüz esedî guruşa nesî’eten bey‘ ve teslîm ol dahi iştirâ ve tesellüm etmişdi, lâkin zikr olunan atın ayaklarında tuzlu balgam marazı olmağla ayb-ı mezbûr [ile] mu‘ayyeb olup ayb-ı mezbûr bâyi‘-i mezbûr yanında mevcûd ve kadîm olup hıyâr-ı ayb ile muhayyer olduğuma binâen zikr olunan atı mezbûru diğer Mehmed Bey’e red murâdımdır suâl olunsun dedikde zikr olunan at elân ayb-ı mezbûr ile mu‘ayyeb olduğu nalbant tâifesinden üstâd Seyfullah b. Mehmed ve Hacı Mehmed b. Kenan nâm kimesneler ihbârları ile mu‘ayyen oldukdan sonra mezbûr diğer Mehmed Bey’e suâl olundukda mezbûr diğer Mehmed Bey zikr olunan atı semen-i mezbûra müdde‘î-i mezbûra nesî’eten bey‘ ve teslîm ettiğini ikrâr lâkin ayb-ı mezbûrun kable’l-bey‘ mevcûd olup kadîm olduğunu inkâr edicek müdde‘î-i mezbûrdan ayb-ı mezbûrun kıdemine beyyine taleb olundukda mahmiye-i mezbûr hısnı ebvâbından Mevlevîhâne Yenikapısı hâricinde Lâlî Çelebi mahallesinde sâkin Berber Ahmed b. Mehmed ve Halil Yazıcı b. İbrahim nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka zikr olunan at kable’l-bey‘ bâyi‘-i mezbûr yanında iken ayb-ı mezbûr ile mu‘ayyeb idi biz ayb-ı mezbûrun kadîm olduğuna şâhidiz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince zikr olunan atı istirdâd ve ahz u kabza mezbûr diğer Mehmed Bey’e tenbîh olunmağın mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Hacı Mehmed b. Süleyman, Hacı Mehmed b. Receb, Ali Beşe b. Yusuf, Mehmed Çelebi b. Abdullah.