Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 736 Hüküm no: 953 Orijinal metin no: [113b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Nurullah’ın aldığı borç karşılığı para vakfına evini istiğlâl yoluyla sattığı Mahmiye-i İstanbul’da Çakır Ağa mahallesi sükkânından Hasan Bey b. Nurullah nâm kimesne meclis-i şer‘-i şerîf-i lâzımü’t-teşrîfde merhûme Şâkire Hâtun nâm sâhibü’l-hayrın gallesi İbrahim Paşa sarayı’nda olan gulâmın ta‘âmiyelerine meşrût vakfı olan nukūdun mütevellîsi olan Hasan Ağa b. Abdullah nâm kimesne mahzarında ikrâr ve takrîr-i kelâm edip mahalle-i mezbûrda vâki‘ bir tarafdan Medîne-i Münevvere vakfı ve bir tarafdan Geylan Ağa mektebi ve bir tarafdan Ali Bey b. Abdullah nâm kimesne mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilimi bi tarîki’l-istiğlâl mütevellî-i mezbûra yüz otuz esedî guruşa bey‘ ve teslîm ol dahi vakf-ı mezbûr için vech-i muharrer üzre iştirâ ve tesellüm edip semen-i mezbûru mâl-ı vakf-ı mezbûrdan bana def` ve teslîm ettiğinden sonra ba‘de’t-tahliyyeti’ş-şer‘iyye ve’t-tekābuzi’l-mer‘î menzil-i mezbûru fâriğan ani’ş-şevâgil târih-i kitâbdan üç yüz altmış gün tamâmına değin on dokuz buçuk guruşa bana îcâr ve teslîm ben dahi istîcâr ve tesellüm eyledim, eğer târih-i mezbûr tamâmında meblağ-ı mezbûru edâ eylemezsem menzil-i mezbûrun semen-i misli ile bey‘a ve semeninden meblağ-ı mezbûru istîfâya bâkī kalırsa bana edâya mezbûr Hasan Ağa’yı küllemâ azeltüke fe-ente vekîli mazmûnu üzre azl ve in‘izâlden masûne vekâlet-i devriye ile vekîl ve nâib-i menâb nasb ve ta‘yîn eyledim dedikde gıbbe’t-tasdîk-i şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: Ali Efendi b. Hüseyin imâm-ı saray-ı mezbûr, fahrü’l-eşbâh Şaban Ağa Ser-muhzırân, Seyyid Mehmed Ağa b. Hakkı, Hasan Ağa, Abdülbâkī b. Abdülganî, Hasan b. Ahmed.