Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 99 Hüküm no: 37 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in merhume kızından kalan hissesine el koyan Cafer Bey’den teslim aldığı Mahrûse-i Galata a‘mâlinden Tophâneˈde Ebufazl mahallesinde sâkine iken bundan akdem vefât eden el-Hâc Mehmedˈin verâseti zevc-i metrûku Cafer Bey b. Ahmedˈe ve babası mezbûr el-Hâc Mehmed b. Gülâbî ile kebîr oğlu Mehmedˈe ve sagīre kızı Âişeˈye münhasıra olduğu şer‘an zâhir ve müte‘ayyin oldukdan sonra mezbûr el-Hâc Mehmed meclis-i şer‘-i şerîfde merkūm Cafer Bey mahzarında ikrâr ve takrîr-i kelâm edip kızım müteveffât-ı mezbûrenin terekesinden benim südüs hisseme isâbet eden ber-mûceb-i defter-i kassâm-ı askerî altı yüz yetmiş akçe hakkımı terekesine vâzi‘uˈl-yed olan mezbûr Cafer Bey yedinde olup kabz edip ve mukaddemâ kızım müteveffât-ı mezbûre yedinde emânet vaz‘ teslîm eylediğim yedi yüz akçe kıymetli bir sîm zincirimi müteveffât-ı mezbûra âhara bey‘ ve semenini mesârifine sarfla istihlâk etmekle meblağ-ı mezbûr yedinde kalmağla el-hâletü hâzihî merkūm Cafer Bey yedinden iki yüz akçe [ahz] ü kabz edip husûs-ı mirasa ve sâlifüˈz-zikr sîm zincir da‘vâsına müte‘allik merkūm Cafer Bey ile da‘vâ ve nizâ‘ ve alâka ve medhalim kalmadı dedikde gıbbeˈt-tasdîkiˈş-şer‘iyiˈl-mu‘teber mâ vaka‘a biˈt-taleb ketb olundu. Fiˈl-âşir mineˈl-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak