Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 737 Hüküm no: 954 Orijinal metin no: [113b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Mehmed’in, Mustafa Efendi b. Mehmed’de alacağı kaldığının tespiti Mahmiye-i İstanbul’da Yenibahçe kurbunda Ali Paşa-yı Atîk mahallesi sükkânından Ahmed Efendi b. Mehmed nâm kimesne meclis-i şer‘-i şerîfde bâ‘isü’l-kitâb Mustafa Efendi b. Ahmed nâm kimesne mahzarında üzerine da‘vâ ve takrîr-i kelâm edip bundan akdem mezbûr Mustafa Efendi’ye yirmi kıt‘a esedî guruşumu bir def‘a ve on kıt‘a esedî guruşu bir def‘a ikrâz ve teslîm edip ol dahi iktirâz ve tesellüm etmişidi, suâl olunup meblağ-ı mezbûrun vech-i muharrer Mustafa Efendi zimmetinde deyn-i şer‘îden hakkım olan on üç buçuk esedî guruşun mezbûr Mustafa Efendi’den alıverilmesi matlûbumdur dedikde, gıbbe’s-suâl mezbûr Mustafa Efendi cevâbında müdde‘î-i mezbûra cihet-i deyn-i şer‘îden zimmetimde on buçuk kıt‘a esedî guruş deynim olup lâkin vech-i mübeyyen üzre müdde‘î-i mezbûrdan iki def‘a iktirâz ve kabz ettiğim otuz esedî guruşu mukaddemâ müdde‘î-i mezbûru ba‘zı da‘vâsından def‘ ile mukābele edicek gıbbe’s-suâl ve’l-inkâr mezbûr Mustafa Efendi’den def‘-i mezbûru mübeyyine beyyine taleb olundukda [114a] ityân-ı beyyine için istimhâl olmağla mehl-i şer‘î ile imhâl olundukdan sonra ikrârı mûcebince meblağ-ı mezbûr on üç buçuk esedî guruşu müdde‘î-i mezbûra edâya mezbûr Mustafa’ya tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Beşe