Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 112 Hüküm no: 46 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, merhum Mehmed Çavuş Kapudan’ın azatlı kölesi olmasından dolayı varislerin mülk iddialarının reddedildiği İşbu orta boylu, açık kaşlı elâ gözlü, Lehiyyüˈl-asl bâ‘is-i hâzeˈl-kitâb Hasan b. Abdullah meclis-i şer‘de mahrûse-i Galataˈda Alaca Mescid mahallesinde sâkin iken bundan akdem vefât eden Mehmed Çavuş Kapudan b. Ayas nâm kimesnenin verâseti zevce-i metrûkesi Afife bt. Haydar ile li-ebeveyn karındaşı oğulları Mustafa Çelebi b. Ali ve Bektaş Beşe b. İbrahim nâm kimesnelere münhasıra olduğu şer‘an zâhir ve müte‘ayyin oldukdan sonra merkūme Afife ile mezbûr Mustafa Çelebi mahzarlarında üzerlerine da‘vâ ve takrîr-i kelâm edip ben müteveffâ-yı mezbûrun abd-i memlûku olup lâkin müteveffâ-yı mezbûr târih-i kitâbdan yedi sene mukaddem hâl-i sıhhatinde huzûr-ı Müslimînˈde beni tedbîr-i mutlak ile müdebber eyleyip ba‘dehû fevt oldukda mâlının sülüsü kıymetime müsâ‘id olmağla ben hür olmuş iken mezbûrân Mustafa Çelebi ve Afife bana rık olmak üzre vaz‘-ı yed ederler suâl olunup sebîlim tahliye ve üzerimden yed-i âdiyeleri nez‘ olunmaları matlûbumdur dedikde gıbbeˈs-suâl veˈl-inkâr mezbûr Hasanˈdan müdde‘âsını mübeyyine beyine taleb olundukda mahalle-i mezbûre sâkinlerinden es-Seyyid Bedreddin Çelebi b. Hasan Efendi ve Ali Beşe b. Eyüb ve Mustafa Çelebi b. Ali nâm kimesneler li-ecliˈş-şehâde meclis-i şer‘a hâzırûn olup isreˈl-istişhâd fiˈl-vâki‘ müteveffâ-yı mezbûr hayatında târih-i mezbûrda abd-i memlûku olan merkūm Hasanˈı mülkünde olduğu hâlde bizim huzûrumuzda tedbîr-i mutlak ile tedbîr edip hâlen vefât edip mâlının sülüsü dahi mezbûr Hasanˈın kıymetine [10a] müsâ‘iddir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra mûcebiyle merkūm Hasanˈın ıtkına ba‘deˈl-hükm mezbûrân Afife ve Mustafa Çelebiˈye bî-vech ta‘arruzdan men‘ birle mâ vaka‘a biˈt-taleb ketb olundu. Fiˈs-sâmin veˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: İbrahim Efendi el-imâm, el-Hâc Muslı b. Hüseyin, İbrahim Bey b. Mustafa, Mustafa Çelebi b. Mehmed, Murtezâ b. Abdullah, el-Hâc Ali b. ( ), Mustafa Beşe b. Süleyman