Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 113 Hüküm no: 47 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmet adlı küçük çocuğa Hatice bt. İvaz Beşe’nin vasî ve nafaka tayin edildiği Medîne-i Hazret-i Ebâ Eyyûbeˈl-Ensârî mahallâtından Ali Paşa mahallesinde sâkine işbu bâ‘isetüˈl-vesîka Hadîce bt. Ivaz Beşe nâm hatun meclis-i şer‘-i şerîfde takrîr-i kelâm edip li-eb karındaşım olup işbu hazır Ahmed nâm sagīr vâlidesi Gülferah bt. Abdullah nâm hatunun yanında hacr ü terbiyesinde vasîsi olan Subhî nâm hatun hâkimüˈş-şer‘a sagīr-i mezbûrun nafaka ve kisvesi’çün babasından müntakil mâlından günde yirmi beş akçe farz ve takdîr ettirmişidi el-hâletü hâzihî mezbûre Subhî maraza olup emr-i vesâyeti görmeğe kādire olmamağla vesâyetinden azl ve yerine kıbel-i şer‘den el-Hâc Ebûbekir nâm kimesne vasî nasb olundukdan sonra merkūme Gülferah dahi vefât etmekle sagīr-i mezbûru bi-hakkiˈl-hıdâne hükm-ı hâkim ile ben alıp hacr ü terbiyemde olmağla savb-ı şer‘den nafaka ve kisve-bahâ takdîr olunması matlûbumdur dedikde hâkim-i muvakki‘-i sadr-ı kitâbtûbâ-lehû ve hüsnü-meâb hazretlerine babasından müntakil mâlından târih-i kitâbdan sagīr-i mezbûrun nafaka ve kisvesi’çün günde yirmi beş akçe farz ve takdîr edip vakt-i zarûretde istidâne ve hîn-i zaferde zevce-i mezbûre Hadiceˈye izin vermeğin bu vesîka biˈt-taleb ketb olundu. Fî-gurreti Zilhiccetiˈş-şerîfe li-sene selâse ve semânîn ve elf. Şûhûdü’l-hâl: Mustafa Efendi İmâm-ı Dâye, Yahya Çelebi b. Mustafa, Mustafa Beşe b. Halil, Osman Çelebi Vekîl-i imâmzâde, Mehmed b. Ahmed