Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 115 Hüküm no: 49 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe bt. Hüseyin’in terekesinin, kocasından alınıp çocuklarının vasîsi olan Adile Hatun’a teslim edilmesi Havâss-ı aliyye kazâsına tâbi‘ Küçükçekmece mütemekkinlerinden bâ‘isetü hâzeˈl-kitâb Adile bt. Kurd Ağa nâm hatun tarafından da‘vâ-yı âtiˈl-beyâna vekîl olup vekâleti zât-ı mezbûreyi ma‘rifet-i şer‘iye ile ârifân olan Hüseyin Ağa b. ( ) ve Mehmed Ağa b. Mustafa şehâdetleriyle şer‘an sâbite olan fahrüˈl-müderrisîniˈl-kirâm Mehmed Efendi b. Yunus meclis-i şer‘-i hatîr-i lâzımüˈt-tevkīrde zikri sebk[eden] Çekmece-i Sagīr sükkânından iken bundan akdem vefât eden Âişe bt. Hüseyin Ağa nâm hatunun zevc-i metrûku Süleyman b. Abdullah mahzarında biˈl-vekâle üzerine da‘vâ ve takrîr-i kelâm edip müvekkilem mezbûre Adile Hatunˈun sadrî kızı müteveffiye-i mezkûre Âişeˈnin sadrî sagīr oğulları olup hâlâ babaları işbu Süleyman Beyˈin yedinde olan Ahmed ve Hüseyin nâm sagīrlerin hakk-ı hıdâneleri ba‘de vefâtiˈl-üm müvekkilem mezkûre Adile Hatunˈa âid olmağla ahz ve imsâk murâd edip sagīrân-ı mezbûrânı hükmüˈl-hıdâne taleb eylediğinde mezbûr Süleyman Bey vermeden imtinâ‘ eder suâl olunup teslîmine tenbîh olunmak murâd eder dedikde gıbbeˈs-suâl mezbûr Süleyman Bey müvekkile-i mezbûre Adile Hatunˈun sagīrân-ı merkūmân Ahmed ve Hüseyin min-kıbeliˈl-üm ceddeleri olduğunu ikrâr ve i‘tirâf edicek mezkûr Süleyman Beyˈe sagīrân-ı mezbûrânı bi-hükmiˈl-hıdâne müvekkile-i merkūme Adile Hatunˈa teslîmine bâdeˈt-tenbîh mâ vaka‘a biˈt-taleb ketb olundu. Fî-evâil-i Muharremiˈl-harâm li-sene erba‘a ve semânîn ve elf. Şuhûdüˈl-hâl: Yusuf Bey b. Abdullah, Mehmed Çelebi b. Abdullah, Ahmed Ağa b. ( ) el-mübâşir, Hüseyin Çelebi b. Ali, Mehmed Bey b. Abdullah, Hüseyin Beşe b. Abdülmennan, Siyavuş Ağa