Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 124 Hüküm no: 53 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gonca bt. Abdullah’ın, merhume Ayşe bt. Hasan Ağa’nın azatlı cariyesi olduğu Orta boylu, gök gözlü, Rusiyyüˈl-asl râfi‘a-ihâzeˈl-kitâb Gonca bt. Abdullah meclis-i şer‘-i hatîr-i lâzımüˈt-tevkîrde Galata a‘mâlinden Fındıklıˈda vâki‘a merhûm Molla Çelebi mahallesi sâkinelerinden iken bundan akdem vefât eden Âişe bt. Hasan Ağaˈnın muhallefâtına biˈl-verâse vâzi‘uˈl-yed olan zevc-i metrûku Mustafa Ağa b. Hüseyin mahzarında üzerine da‘vâ ve takrîr-i kelâm edip ben müteveffiye-i mezbûre Âişeˈnin câriye-i memlûkesi olup hâl-i hâyatında ve kemâl-i akl u sıhhatinde mülkünde olduğum hâlde beni mâlından âzad edip ben hürre olmuş iken hâlen mu‘takam mezbûre Âişe Hatun vefât etmekle mezbûr Mustafa Ağa bana rık olmak üzre vaz‘-ı yed ve muhallefât-ı mezbûreye idhâl murâd eder suâl olunup üzerimden yed-i âdiyesini ref‘ ve sebîlim tahliye olunmak matlûbumdur dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden olup mezbûr Fındıklıˈda Selime Hatun mahallesi sükkânından Hasan Çelebi b. Mehmed ve Molla Çelebi Câmi‘i kayyımı İbrahim Alemşah nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müdde‘iyye-i mezbûre Gonca ba‘demâ müteveffiye-i mezkûre Âişe Hatunˈun câriye-i memlûkesi iken hâl-i hayatında ve kemâl-i akl u sıhhatinde mezkûre Goncaˈyı mülkünde olduğu hâlde mâlından âzad eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbeˈt-ta‘dîl veˈt-tezkiye şehâdetleri makbûle olmağın mûcebiyleba‘deˈl-hükm bî-vech müdâhaleden men‘ birle mâ vaka‘a biˈt-taleb ketb olundu. Fî-evâiliˈl-Muharrem li-sene erba‘a ve semânîn ve elf. Şuhûdüˈl-hâl: Rasûl Efendi el-imâm, Mustafa Efendi b. Hüseyin, Mehmed Efendi b. Ali, Hacı Hüseyin b. Mir, el-Hâc Süleyman b. Mustafa, Ahmed Ağa b. Osman, Halil b. Osman