Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 125 Hüküm no: 54 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülistan bt. Abdullah’ın, merhume Ayşe bt. Hasan Ağa’nın azatlı cariyesi olduğu İşbu uzun boylu, gök gözlü Rusiyyetüˈl-asl râfi‘a-ihâzeˈl-kitâb Gülistan bt. Abdullah nâm hatun meclis-i şer‘-i hatîrde bundan akdem Fındıklıˈda merhûm Molla Çelebi mahallesi sâkinelerinden iken vefât eden Âişe bt. Hasan Ağa nâm hatun muhallefâtına biˈl-verâse vâzi‘uˈl-yed zevc-i metrûku Mustafa Ağa b. Hüseyin mahzarında üzerine da‘vâ ve takrîr-i kelâm edip ben müteveffiye-i mezbûre Âişe Hatunˈun silk-i mülk-i sahîhinde münselik câriye-i memlûkesi iken mülkünde olduğum hâlde beni mezbûre Âişe Hatun hâl-i hayatında ve kemâl-i akl u sıhhatinde mâlından âzad edip ben hurre olmuş iken hâlen vefât etmekle mezbûr Mustafa Ağa bana rık olmak üzre vaz‘-ı yed ve muhallefât-ı mezbûreye idhâl murâd eder suâl olunup üzerimden yed-i âdiyesini ref‘ olunmak matlûbumdur dedikde gıbbeˈs-suâl akībeˈl-inkâr ve isre-talebiˈl-beyyine udûl-ı Müslimînˈden Fındıklıˈda merhûme Selime Hatun mahallesinde sâkin Osman b. Ahmed ve zikri sebk eden Molla Çelebi mahallesi sükkânından Aydın Bey b. Durak nâm kimesneler li-ecliˈş-şehâde meclis-i şer‘a hâzırân olup işhâd olunduklarında fiˈl-vâki‘ müdde‘iyye-i mezbûre Gülistan bundan akdem mezbûre Âişe Hatunˈun câriye-i memlûkesi müteveffiye-i mezbûre hâl-i hayatında ve kemâl-i akl u sıhhatinde merkūme Gülistanˈı mülkünde olduğu hâlde mâlından âzad eyledim biz bu husûsa şâhidleriz şehâdet dahi ederiz deyü ba‘deˈl-hükm mezbûr Mustafa Ağaˈya bî-vech müdâhaleden men‘ birle biˈt-taleb ketb olundu. Fî-evâil-i şehr-i Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak