Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 125 Hüküm no: 55 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ömer Çelebi Beşe’den intikal eden evin vasî tarafından vakfa satılıp kiralandığı Mahrûse-i Galata hâricinde vâki‘ Saray-ı Âmireˈde merhûm Halil Ağa nâm sahibüˈl-hayrın nükūd-ı mevkūfesine hâlen mütevellî olan işbu bâ‘isüˈl-kitâb Ahmed Çelebi b. Hüseyin meclis-i şer‘-i şerîfde mahrûse-i merkūme a‘mâlinden kasaba-i Kasımpaşaˈda Küçük Piyale Paşa mahallesinde sâkin iken bundan akdem vefât eden Ömer Çelebi Beşe b. Abdullah nâm kimesnenin verâseti zevce-i metrûkesi Hadîce bt. Mehmed ile sulbî sagīr oğulları Mehmed ve Ahmed ve Mustafa ve sagīre kızı Sâlihaˈya münhasıra olduğu şer‘an zâhir ve müte‘ayyin oldukdan sonra sıgār-ı mezkûrenin tesviye-i emirlerine kıbel-i şer‘den mansûb vasîleri olup tereke-i müteveffâ-yı mezbûre vâzi‘uˈl-yed olan İbrahim b. İlyas ile merkūme Hadîce mahzarında biˈt-tevliye üzerlerine da‘vâ ve takrîr-i kelâm edip bin yetmiş beş senesi Şa‘bânıˈnın dokuzuncu gününde müteveffâ-yı mezbûre mal-ı vakf-ı mezbûrdan iki yüz kıt‘a esedî idâne ve teslîm ol dahi istidâne ve kabz ettikden sonra meblağ-ı mezbûr mukābelesinde mahalle-i mezbûrede vâki‘ bir tarafdan el-Hâc Mehmed ve bir tarafdan Osman Çelebi mülkleri ve bir tarafdan el-Hâc Hasan Vakfı ve bir tarafdan tarîk-i âmma müntehî buyûtu müştemil mülk menzilini bi-tarîkıˈl-istiğlâl târih-i merkūmda kasaba-i mezbûrede nâibüˈş-şer‘ Mehmed Efendi b. Numan huzûrunda bana bey‘ ve teslîm ve ben dahiba‘deˈl-iştirâ veˈt-tesellüm yine menzil-i mezbûru târih-i mezbûrda ba‘deˈt-tahliyetiˈş-şer‘iye merkūm Ömer Çavuş bir sene tamânına dek yirmi beş guruş ücretle îcâr ve teslîm ol dahi ba‘deˈl-isticâr asl-ı mal-ı mezbûr ile [12b] ücret-i mezkûreyi kableˈl-istifâ mezbûr Ömer Çavuş fevt olmağla hâlen vasî-i merkūme ile mezbûre Hadiceˈnin yedlerinde olan terekesinde biˈt-tevliye taleb ederim deyü târih-i mezbûr ile müverraha ve merkūm Mehmed Efendi b. Numan imzâsıyla mümzâ ve hatmiyle mahtûm hüccet-i şer‘iye ibrâz ve merkūmânın muvâcehelerinde feth ü kırâet ve istintâk olundukda mazmûn-ı hüccet-i merkūmeyi inkâr eylediklerinde mütevellî-i merkūmdan mazmûn-ı hüccet-i mezkûreye beyyine taleb olundukda udûl-ı Müslimînˈden Mehmed Efendi b. Ali ve Süleyman Çelebi b. Derviş nâm kimesneler li-ecliˈş-şehâde meclis-i şer‘a hâzırân olup isreˈl-istişhâd el-vâki‘ müteveffâ-yı mezbûr târih-i merkūmda nâib-i mezkûr huzûrunda mütevellî-i mezbûr yedinden mal-ı vakf-ı merkūmdan iki yüz esedî guruş istidâne ve kabz ettikden sonra menzil-i mezbûrîni bi-tarîkıˈl-istiğlâl mütevellî-i mezbûre bey‘ ol dahi ba‘deˈl-iştirâ veˈt-tesellüm senede yirmi beş guruş ücretle huzûrumuzda müteveffâ-yı merkūme ba‘deˈt-tahliye veˈt-tekābuz îcâr ve teslîm ol dahi ba‘deˈl-isticâr nâib-i merkūmdahi işbu hüccet-i mezbûreyi tahrîr ve mütevellî-i merkūm yedine def‘ ve teslîm eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyeti şerâyitiˈl-kabûl şehâdetleri makbûle oldukdan sonra mütevellî-i mezbûr ba‘deˈt-tahlîf mûcebiyle hükm birle mâ vaka‘a biˈt-taleb ketb olundu. Fiˈl-hâmis-i aşer min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mehmed Efendi b. Ali, Şa‘bân Efendi b. ( ), Bekir Halîfe b. Mustafa el-müezzin, Mahmud Çelebi b. Ahmed, Hamza Beşe b. Mehmed