Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 127 Hüküm no: 57 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin, Mehmed Efendi’nin evinin Ahmet Çelebi’ye satılmasına vekil tayin olunduğu Mahrûse-i Galata dâhilinde Boyluoğlu mahallesinde sâkin Mustafa Beşe b. Halil meclis-i şer‘-i şerîfde mefharüˈl-kirâm Mehmed Efendi b. el-müvellâ el-merhûm Yahya Efendi tarafından ikrâr-ı câ’iˈz-zikri tasdîka vekîl olup nehc-i mu‘teber üzre şer‘an vekâleti sâbite olan Ahmed Çelebi b. Davud mahzarında ikrâr ve takrîr-i kelâm edip mahalle-i mezbûrede vâki‘ bir tarafdan birâderim İsa Bey mülküne ve bir tarafdan mahalle-i mezbûre imâm ve müezzinine meşrûta olan vakf menziline ve bir tarafdan tarîk-i hâssa ve bir tarafdan tarîk-i âmma müntehî büyûtu müştemil menzilimi cemî‘ tevâbi‘iyle müvekkil-i müşârün-ileyhe yüz on esedî guruş ve bir rub‘ guruşa bey‘ edip ol dahi bi-tarîkıˈl-istiğlâl iştirâ ve tesellüm eyledikden sonra semeni olan meblağ-ı mezbûru müvekkil-i mûmâ-ileyh yedinden biˈt-tamam ahz u kabz eyledikden sonra yine menzil-i mezbûru ba‘deˈt-tahliyetiˈş-şer‘iye veˈt-tekābuzüˈl-mer‘î târih-i kitâbdan üç yüz altmış gün tamamına dek on yedi esedî guruş rub‘ guruş ücretle müvekkil-i müşârün-ileyh bana îcâr ve teslîm ve ben dahi istîcâr ve tesellüm eyledim dedikde gıbbeˈt-tasdîk menzil-i mezbûrun derkine ve ücret-i lâzımesine işbu hazır biˈl-meclis el-Hâc Mehmed Efendi b. Hasan Efendi tarafından emr u kabûlü hâviye kefâletle kefîl oldum dedikde ba‘deˈt-tasdîkiˈl-mu‘teber mâ vaka‘a biˈt-taleb ketb olundu. Fî-gurreti Muharremiˈl-harâm li-sene erba‘a ve semânîn ve elf. Şuhûdüˈl-hâl: el-Hâc Ahmed Çelebi Kanlıcalı, Ömer Efendi b. Ali, el-Hâc Zülfikar b. Abdullah, Ali Bey b. Halil, Ahmed b. Osman