Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 134 Hüküm no: 59 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmet Ağa b. Kurd’un küçük çocukları için Fatma bt. Halil’in vasî tayin edildiği Medîne-i Hazret-i Ebâ Eyyûbeˈl-Ensârî mahallâtından Baba Haydar mahallesinde sâkin iken bundan akdem fevt olan Ahmed Ağa b. Kurdˈun sagīre kızları Rahime ve Emine ve Emetullah ve Hadiceˈnin tesviye-i emirlerine kıbel-i şer‘den bir vasî nasb olunmak mühim olmağın vâlideleri işbu bâ‘isetüˈl-vesîka Fatma bt. Halil nâm hatun her vechile müstakīm olmağla hâkim-i muvakki‘-i sadr-ı kitâbtûbâ-lehû ve hüsnü-meâb hazretleri merkūme Fatmaˈyı sagīrât-ı mezkûrâta babalarından intikāl eden mallarını hıfz ve hallerini zabta vasî nasb ve ta‘yîn eyledikde ol dahi kabûl ve hizmet-i lâzımesini edâya müte‘ahhide olmağın mâ vaka‘a biˈt-taleb ketb olundu. Fiˈl-âşir mineˈl-Muharremiˈl-harâm li-sene erba‘a ve semânîn ve elf. Şuhûdüˈl-hâl: Umdetüˈl-a‘yân Şa‘bân Ağa, Mehmed Efendi b. Ömer, Esad Efendi b. Mesud Efendi, Mehmed Efendi el-imâm, Mustafa Çelebi b. Hüseyin, Mustafa Bey b. Mehmed, Mustafa Çelebi Kâtib