Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 134 Hüküm no: 60 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın küçük çocuklarına vasî tayin edilen Fatma’nın, Salih Çelebi’den terekeyi teslim aldığı Medîne-i Hazret-i Ebâ Eyyûb mahallâtından Baba Haydar mahallesinde sâkin iken bundan akdem vefât eden Ahmed Ağa b. Kurdˈun verâseti zevce-i metrûkesi Fatma bt. Halil ile sulbî sagīr oğulları Mehmed ve Murad ve Süleyman ve Şit ve Mustafa ve İbrahim ve kebîre kızları Hamide ve Râziye ve sagīre kızları Rahime ve Emine ve Emetullah ve Hadîce ve Havvaˈya münhasıra olduğu şer‘an zâhir ve müte‘ayyin oldukdan sonra kendi tarafından asâleten ve kızları sagīretân-ı mezbûretanın tesviye-i emirlerine savb-ı şer‘den mensûb vasî olan mezbûre Fatma vesâyeten meclis-i şer‘de sıgār-ı mezkûrînin tesviye-i emirlerine kıbel-i şer‘den mansûb vasîleri olup tereke-i müteveffâ-yı mezbûre vâzi‘uˈl-yed olan bâ‘isüˈl-vesîka Salih Çelebi b. Murad mahzarlarında ikrâr ve takrîr-i kelâm edip zevcim müteveffâ-yı mezbûrun zimmetinde mütekarrir olan sekiz bin akçe müeccelem ile terekesinden benim semen-i hisseme isâbet eden ber-mûceb-i kassâm-ı askerî on dokuz bin üç yüz otuz akçe hakkım vasî-i mezbûr Salih Çelebi yedinden alıp kabz husûs-ı mirasa ve mehrim olan meblağ-ı mezbûra müte‘allika vechen mineˈl-vücûh vasî-i merkūm Salih Çelebi yedinde hakkım kalmadığından mâ‘adâ vasîleri olduğum kızlarım sagīrât-ı mezkûrâtın hisselerinden dahi merkūm Salih Çelebi yedinden on iki bin akçe alıp kabz eyledim dedikde gıbbeˈt-tasdîkiˈş-şer‘ mâ vaka‘a biˈt-taleb ketb olundu. Fiˈl-işrîn min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak