Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 141 Hüküm no: 62 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hüseyin Ağa’dan karısı Emetullah’a kalan ev hissesinin, Emetullah tarafından diğer varisler İsmail ve Ayşe’ye satıldığı Husûs-ı âtiˈl-beyânın mahâllinde tahrîri iltimâs olunmağın kıbel-i şer‘den Mevlânâ el-Hâc Mehmed Efendi b. Hasan Efendi irsâl olunup ol dahi mahrûse-i Galata a‘mâlinden Kal‘a-i Boğazkesen mahallâtından el-Hâc Kemâl mahallesinde sâkine iken bundan [bundan] akdem vefât eden Hüseyin Ağa b. Abdullahˈın menziline varıp zeyl-i vesîkada isimleri muharrer olan Müslimîn huzûrlarında akd-i meclis eyledikde müteveffâ-yı mezbûrun verâseti zevce-i metrûkesi Emetullah bt. Hızır ile li-ebeveyn karındaşı Âişeˈye ve li-ebeveyn er karındaşı oğulları İsmail ve gāib Mehmedˈe münhasıra olduğu şer‘an zâhir ve müte‘ayyin oldukdan sonra mezbûre Emetullah meclis-i ma‘kūd-ı mezbûrda işbu bâ‘isüˈl-vesîka mezbûrân İsmail ve Âişe mahzarlarında ikrâr ve takrîr-i kelâm edip müteveffâ-yı mezbûrun mahalle-i merkūmede vâki‘ bir tarafdan Kethudâ Mustafa Ağa mülküne ve bir tarafdan Kapudan Hüseyin mülküne ve bir tarafdan Havva bt. İsmail mülküne ve bir tarafdan tarîk-i âmma müntehî hâriciyede iki bâb fevkānî oda ve bir ahır ve bir kenîfi ve dâhiliyede iki fevkānî oda ve bir matbah ve tahta bendi ve bir kîleri ve bir kenîfi müştemil mülk menzilini ba‘de vefâtihî yirmi dört sehimden i‘tibâr olunup sihhâm-ı mezbûrede altı sehim bana ve on iki sehmi kız karındaşı mezbûre Âişe ve üç sehmi mezkûrân İsmail ve Mehmedˈe intikāl ve isâbet ettikden sonra menzil-i mezbûru bî-garaz Müslimîn tahmîn ve takvîm ile kırk sekiz bin altı yüz akçeye takvîm olundukdan sonra menzil-i mezbûrda olan altı sehim hisse-i şer‘iyemi mezbûrân İsmail ve Âişeˈye aleˈl-iştirâkiˈs-seviy on iki bin yüz elli akçeye tarafeynden îcâb ve kabûlü hâvî bey‘-ı bâtt-ı sahîhüˈş-şer‘i ile bey‘ ve teslîm anlar dahiba‘deˈl-iştirâ veˈt-teslîm semenî olan meblağ-ı mezbûr on iki [bin] yüz elli akçeye merkūmân İsmail ve Âişe yedlerinden biˈt-tamam alıp kabz eyledim ba‘deˈl-yevm menzil-i mezbûrda olan altı sehim hissemi mezbûrân İsmail ve Âişeˈnin mülk-i müşterâsıdır keyfe mâ yeşâ mutasarrıf olsunlar dedikde gıbbeˈt-tasdîk vâki‘ hâlî Mevlânâ-yı mezbûr mahâllinde tahrîr ba‘demâ irsâl olunan Hüseyin Çelebi b. Ali ve Ahmed Beşe ile meclis-i şer‘a gelip alâ-vukû‘ihî inhâ ve takrîr-i kelâm etmeğin mâ hüveˈl-vâki‘ biˈt-taleb ketb olundu. Fiˈl-hâmis min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mustafa Ağa b. Hüseyin, Ali Efendi b. Hüseyin, Pîrî Kapudan b. Hızır, Süleyman Çelebi b. Yusuf, Derviş Efendi el-imâm