Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 143 Hüküm no: 64 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Hızır’ın, kocası merhum Hüseyin Ağa’nın zimmetindeki mehrini diğer varislerden talep ettiği Husûs-ı âtiˈz-zikrin mahâllinde istimâ‘ ve tahrîrine biˈt-taleb savb-ı şer‘den me’zûn olan Mevlânâ el-Hâc Mehmed Efendi b. Hasan Efendi irsâl olunup ol dahi mahrûse-i Galata a‘mâlinden Kal‘a-i Boğazkesen mahallâtından el-Hâc Kemâl mahallesinde sâkin iken bundan akdem vefât eden Hüseyin Ağa b. Abdullahˈın menziline varıp zeyl-i rakīmde muharrer olan Müslimîn huzûrlarında akd-i meclis-i şer‘ eylediklerinde müteveffâ-yı mezbûrun verâseti zevce-i metrûkesi Emetullah bt. Hızır ile li-ebeveyn kız karındaşı Âişeˈye ve li-ebeveyn er karındaşı oğulları İsmail ve gāib Mehmedˈe münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-kitâb merkūme Emetullah meclis-i ma‘kūd[da] mezbûrân Âişeˈye ve İsmail mahzarlarında üzerlerine da‘vâ ve takrîr-i kelâm edip zevcim müteveffâ-yı mezbûrun zimmetinde ma‘kūdun-aleyh olan üç bin akçe mehr-i müeccelim mezbûrdan kableˈl-istifâ fevt olup hâl-i hayatında meblağ-ı mezbûr bana deyni olduğunu alâ-ruûsi’l-işhâd ikrâr ve işhâd dahi etmekle hâlâ mezbûrânın vâzi‘uˈl-yed oldukları terekesinden taleb eder suâl olunsun dedikde gıbbeˈs-suâl veˈl-inkâr müdde‘iyye-i mezbûreden müdde‘âsına beyyine taleb olundukda kal‘a-i mezbûre kurbünde Kayalar imâmı Derviş Efendi b. Musa ve mahalle-i mezbûreden İbrahim Çelebi b. İsmail nâm kimesneler li-ecliˈş-şehâde meclis-i ma‘kūd-ı mezbûra hâzırân olup isreˈl-işhâd fiˈl-hakīka müteveffâ hayâtında zevcem Emetullahˈın üç bin akçe mehr-i müecceli zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’itiˈl-kabûl şehâdetleri makbûle oldukdan sonra mezbûre Emetullahˈa aleˈl-vechiˈl-meşrû‘ tahlîfden sonra vâki‘ hâli mevlânâ-yı mezbûr mahâllinde tahrîr ma‘an irsâl olunan Hüseyin Çelebi b. Ali meclis-i şer‘a gelip alâ-vukû‘ihî inhâ etmeğin mûcebiyle ba‘deˈl-hükm mâ vaka‘a biˈt-taleb ketb olundu. Fî’l-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mâ-sebak