Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 739 Hüküm no: 956 Orijinal metin no: [114a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zabit Mehmed Ağa’nın Mehmed b. Halil’den cerime adıyla haksız olarak aldığı parayı geri ödemesi Vilâyet-i Anadolu’da Gerede kazâsına tâbi‘ ( ) nâm karye ahâlîsinden olup tarakçı tâifesinden bâ‘isü’l-kitâb Mehmed b. Halil nâm kimesne meclis-i şer‘-i şerîf-i lâzımü’t-teşrîfde Mehmed Ağa b. Ali nâm kimesne mahzarında üzerine da‘vâ ve takrîr-i kelâm edip bundan akdem mezbûr Mehmed Ağa karye-i mezbûra zâbit olmağla karındaşın Musa nâm kimesne ammisi oğlunun zevcesine yapışmış deyû cerîme nâmında hâzır bi’l-meclis Ahmed b. Döğenci nâm kimesne yediyle bin dokuz yüz akçemi ahz u kabz edip hattâ ikrâr dahi etmişidi suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda kazâ-i mezbûra tâbi‘ Ulaşlı nâm karye ahâlîsinden İlyas b. Ramazan ve Hacılar nâm karyeden Yunus b. İbrahim nâm kimesneler li ecli’ş-şehâde meclis-i şer‘de hâzırân olup istişhâd olunduklarında fi’l-hakīka mezbûr Mehmed Ağa müdde‘î-i mezbûrun vech-i mübeyyen üzre bin dokuz yüz akçesini ahz u kabz ettiğini bizim huzûrumuzda ikrâr etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr bin dokuz yüz akçeyi müdde‘î-i mezbûra edâ ve teslîme merkūm Mehmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı Ser-muhzırân, Şükrullah Bey b. Tevekkül, Abdi Çelebi b. Hüseyin, Hüseyin Çelebi b. Ahmed, İbrahim Çelebi b. Mehmed.