Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 740 Hüküm no: 957 Orijinal metin no: [114a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Ali’nin eşyalarının kocası Mahmud tarafından alınıp Habib b. Mehmed’e verildiği iddiasını ispat edemediği Mahmiye-i İstanbul’da Mi‘mâr Şuca‘ mahallesinde sâkine Meryem bt. Ali nâm hâtun meclis-i şer‘-i hatîrde işbu bâ‘isü’l-kitâb Habib b. Mehmed nâm kimesne mahzarında üzerine da‘vâ ve takrîr-i kelâm edip zevcim gāib ani’l-meclis Mahmud nâm kimesne târih-i kitâbdan dört sene mukaddem sâkin olduğum menzilim içinde ben yoğiken eşyâ-i memlûkemden yetmiş bâfteli bir sîm kuşak ve iki miskāl inci ve bir yâkut taşlı altın yüzük ve bir arakiyye ve bir bohça ve elli semen ve iki riyâlî guruş ve üç yüz hurda akçe ve beş keten gömlek ve beş don ve üç beledî döşek yüzü ve bir al kutnî yorgan ve üç yemeni yorgan ve iki kırmızı ipek futa ve iki Bursa yastığı ve bir beledî yastığı ahz edip mezbûr Habib’e vermişidi mezbûr Habib’den suâl olunup eşyâ-i mezbûrenin a‘yânı mevcûd ise a‘yânın, değil ise misli ve kıymeti olanlar kıymet-i şer‘iyyeleri alıverilmesi matlûbumdur dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘iyye-i mezbûrenin zevci gāib merkūm Mahmud târih-i mezbûrda vech-i meşrûh üzre eşyâ-i mezbûre-i memlûkesini ahz u kabz ve getirip sana teslîm etmeyip vechile müdde‘iyye-i mezbûrenin üzerinde hakkı olmadığına mezbûr Habib’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince mezbûr Meryem bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çavuş b. ( ), Abdülkerim b. ( ), Mehmed b. Ramazan, Resul [b. ] Rıdvan, İbrahim b. Mehmed.