Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 160 Hüküm no: 76 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın, merhum Kazgancı Ahmed Beşe’nin zimmetindeki mehir alacağını vasîden talep ettiği Galata dâhilinde vâki‘ merhûm ve mağfûrun leh Sultân Bâyezid Han mahallesi sâkinelerinden râfi‘a-ihâzeˈl-kitâb Sâliha bt. Abdullah meclis-i şer‘-i hatîr-ilâzımüˈt-tevkīrde bundan akdem mahalle-i mezbûre sükkânından iken vefât eden Kazgancı Ahmed Beşeˈnin vasî-i muhtârı olmağla muhallefâtına vâzi‘uˈl-yed olan Bostan Beşe b. ( ) nâm kimesne mahzarında üzerine da‘vâ ve takrîr-i kelâm edip zevcem müteveffâ-yı mezbûr Ahmed Beşe zimmetinde mütekarrrer ve ma‘kūdun-aleyh dört bin akçe mehr-i müeccel hakkım olup kableˈl-edâ fevt olmağla hâlâ taleb ederim suâl olunup alıverilmesini murâd ederim dedikde gıbbeˈs-suâl vasî-i mezbûrdan muhallefât-ı müteveffâ-yı mezbûre vaz‘-ı yedini ikrâr mehr-i mezbûru inkâr edicek müdde‘iyye-i mezbûreden da‘vâsına beyyine taleb olundukda udûl-ı Müslimînˈden olup mahalle-i mezbûrede sâkin Hasan b. Mahmud ve Osman b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr Ahmed Beşe işbu müdde‘iyye-i mezbûre Sâliha Hatunˈı hâl-i hayatında ve kemâl-i akl u sıhhatinde bizim huzûrumuzda dört bin akçe mehr-i müeccel üzerine nefsi’çün akd-i nikâh eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle olmağın ba‘deˈt-tahlîfiˈş-şer‘î mûcebiyle ba‘deˈl-hükm mâ vaka‘a biˈt-taleb ketb olundu. Fî-evâil-i şehri Ramazaniˈl-mübârek li-sene selâse ve semânîn ve elf. Şuhûdüˈl-hâl: Hacı Mustafa b. Abdullah, Şa‘bân Çelebi b. el-Hâc Ali, Ali Çelebi b. Zülfikar, Hüseyin b. Ali