Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 169 Hüküm no: 85 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Abdullah’ın çocuklarına vasî olan karısı Fatma’nın, terekeye ait tahsilatı yapması için Mehmed Reis’i vekil tayin ettiği Mahrûse-i Galata muzâfâtından kasaba-i Tophâneˈde Karabaş mahallesinden olup bundan akdem Abaza vilâyetinde vefât eden Hüseyin b. Abdullahˈın verâseti zevce-i metrûkesi Fatma bt. Siyavuş ile sulbî sagīr oğulları Mehmed ve Salih ve İbrahim ve Halilˈe münhasıra olduğu şer‘an zâhir ve müte‘ayyin oldukdan sonra kendi tarafından asâleten ve sıgār-ı mezkûrînin tesviye-i emirlerine kıbel-i şerî‘at-i mergūbeden mansûb vasîleri olan Fatma vesâyeten şer‘-i hatîrde işbu bâ‘isüˈl-vesîka Mehmed Reis b. Ahmed mahzarında ikrâr ve takrîr-i kelâm edip müteveffâ-yı mezbûrun vilâyet-i merkūmeden Ali Bey yedinde vesâir kimesneler yedinde biˈl-emânet mazbûta olan terekesini mezbûrlardan taleb ve da‘vâ ve ahz u kabz ve bana îsâle ve kabz ve îsâl mütevakkıf olduğu umûrun cümlesinde tarafından asâleten ve vesâyeten mezbûr Mehmed Reis vekîl nasb ve ta‘yîn eyledim dedikde ol dahi vekâlet-i merkūmeyi kabûl ve hizmet-i lâzımesini edâya ta‘ahhüd etmeğin mâ vaka‘a biˈt-taleb ketb olundu. Fiˈl-âşir min-Safer sene [10]84. Şuhûdüˈl-hâl: Yusuf b. Abdülmennan, Ali b. Abdullah, Mehmed Reis b. Abdurrahman, Mustafa b. Ali