Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 740 Hüküm no: 958 Orijinal metin no: [114a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Osman’ın, Osman b. Mahmud’dan aldığı câriyenin kusuru çıkmasıyla geri verildiği Mısır tüccârından olup mahmiye-i İstanbul’da Kilidhanı sâkinlerinden olan İbrahim b. Osman nâm kimesne mahfil-i kazâda esirci tâifesinden Osman b. Mahmud nâm kimesne mahzarında üzerine da‘vâ ve takrîr-i kelâm edip işbu açık kaşlı, elâ gözlü Rûsiyyetü’l-asl Fâtıma bt. Abdullah nâm sagīre câriyeyi uyûbdan sâlime olmak üzre yüz on sekiz kıt‘a esedî guruş semen-i makbûza iştirâ ve kabz eylemiş idim lâkin câriye-i mezbûre inde’t-tüccâr noksân semen îcâb eder uyûbdan müfzat? olmak aybı ile mu‘ayyebe olup ayb-ı mezbûr kadîm olmağla suâl olunup câriye-i mezbûre bâyi‘-i mezkûra red olunup semen deyû makbûzu olan meblağ-ı mezkûr yüz on sekiz kıt‘a esedî guruşun bana geri alıverilmesi matlûbumdur dedikde, teveccüh-i husûmet için câriye-i mezbûre huddâm-ı mahkemeden Mehmed b. Mustafa ve Halil b. Hasan ile bu makūle umûru görmeğe taraf-ı saltanat-ı aliyyeden berât-ı şerîf-i âlîşân ile müte‘ayyine olan Gülistan Hâtun bt. Abdullah’a irsâl ve irâe olundukda mezbûre Gülistan câriye-i mezbûre ayb-ı mezkûr ile mu‘ayyebe olduğunu haber verdiği merkūmân Mehmed ve Halil meclis-i şer‘-i celîle gelip ihbâr ettiklerinden sonra merkūm Osman’a suâl olundukda câriye-i mesfûreyi müdde‘î-i mezbûra vech-i muharrer üzre yüz on sekiz kıt‘a esedî guruş semen-i makbûza bey‘ ve teslîm ettiğini ikrâr lâkin ayb-ı mezbûr ile yedinde iken mu‘ayyebe olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Osman’a kable’l-bey‘ câriye-i mezbûre yedinde iken ayb-ı mezbûr ile mu‘ayyebe olmadığına yemîn teklîf olundukda yemînden nükûl etmeğin alâ mûcebi nükûlihî câriye-i merkūme Osman’a red olunup semen deyû makbûzu olan meblağ-ı mezkûr yüz on sekiz kıt‘a esedî guruşu müdde‘î-i mezbûr İbrahim’e red ve teslîme mezbûr Osman’a ba‘de’t-tenbîh mâ vaka‘a bi’t-taleb ketb olundu. [114b] Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Baba Resul [b.] Rıdvan, Veli Bey b. Mahmud, Hasan Çelebi b. Ahmed.