Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 171 Hüküm no: 87 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin, merhum Hüseyin Kapudan’ın zimmetindeki alacağını varislerden talep ettiği Husûs-ı âtiˈl-beyânın mahâllinde istimâ‘ ve tahrîri iltimâs olunmağın savb-ı şer‘den Mevlânâ el-Hâc Mehmed Efendi b. Hasan Efendi irsâl olunup ol dahi mahrûse-i Galataˈda Okçu Musa mahallesinde sâkin Mustafa Efendi b. Mehmedˈin menziline varıp zeyl-i vesîkada isimleri muharrer olan Müslimîn huzûrunda akd-i meclis-i şer‘ eyledikde işbu bâ‘isüˈl-vesîka umdetüˈl-hutebâ Mustafa Efendi b. el-Hâc Ali meclis-i ma‘kūd-ı mezkûrda mahalle-i mezbûrede sâkin iken vefât eden Hüseyin Kapudan b. Yusufˈun verâseti zevce-i metrûkesi Âişe Hatun bt. Mustafa Efendi ile li-ebeveyn kız kardeşi Bağdad [21a] nâm hatuna münhasıra olduğu şer‘an zâhir ve müte‘ayyin oldukdan sonra müteveffâ-yı mezbûrun terekesine vâzi‘atüˈl-yed olan merkūme Âişe Hatun tarafından zikri câ’î husûsa vekîl olup zât-ı merkūmeyi ma‘rifet-i şer‘iye ile ârifân olan Ramazan b. Şa‘bân ve İbrahim b. Mahmud şehâdetleri ile şer‘an vekâleti sâbite olan babası müşârün-ileyh Mustafa Efendi mahzarında üzerine da‘vâ ve takrîr-i kelâm edip ben mahrûse-i mezbûrede vâki‘ Demirci el-Hâc Mahmudˈun nükūd-ı mevkūfesine mütevellî olmağla yedimde olan vakıfdan mukaddemâ müteveffâ-yı mezbûre idâne ve teslîm ol dahi istidâne ve tesellüm eylediği bin esedî guruşun üzerine bir senede onu on bir hesâbı üzre biˈt-tevliye devr-i şer‘iyle ilzâm ettiğim yüz esedî guruş vericek elli guruş hayatında yedinden ahz u istifâ edip bâkī elli guruşu kableˈl-ahz fevt olmağla hâlâ müvekkile-i merkūme yedinde olan terekesinden taleb ederim vekîl-i mûmâ-ileyhe suâl olunsun dedikde gıbbeˈs-suâl veˈl-inkâr mütevellî-i merkūm Mustafa Efendiˈden müdde‘âsına beyyine taleb olundukda udûl-ı ricâlden el-Hâc Mahmud Çelebi b. İbrahim ve Ömer Ağa b. Mustafa li-ecliˈş-şehâde meclis-i mezbûra hâzırân olup isreˈl-istişhâd fiˈl-hakīka müteveffâ-yı mezbûrun mütevellî-i merkūmdan istidâne ve kabz ettiği bin esedî guruşun bir senede onu on bir hesâbı üzre yüz guruş murâbahayı müteveffâ-yı mezbûrun üzerine düşer şer‘ ile üzerine huzûrumuzda ilzâm eyledi biz bu husûsa şâhidiz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra kabûlü mezbûr ba‘deˈt-tahlîf vâki‘ hâli müteveffâ-yı mezbûr mahâllinde tahrîr ba‘dehû ma‘an irsâl olunan İsa Bey b. Halil ve Hüseyin b. Ali ile meclis-i şer‘a gelip alâ-vukû‘ihî inhâ etmeğin mûcebiyle ba‘deˈl-hükm mâ vaka‘a biˈt-taleb ketb olundu. Fiˈs-sâlis min-Saferiˈl-hayr li-sene erba‘a ve semânîn ve elf. Şuhûdüˈl-hâl: Mâ-sebak