Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 191 Hüküm no: 103 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. Mehmed’in terekesindeki evden, amcasına intikal eden yarım hissenin, merhumun karısı Rabia Hatun’a verildiği Mahmiye-i Galata hâricinde Yazıcı mahallesinde sâkin iken bundan akdem vefât eden Hüseyin Bey b. Mehmedˈin verâseti zevce-i metrûkesi Râbia Hatun bt. İbrahimˈe ve sulbî kebîr oğlu Mehmed Çelebiˈye münhasıra olup kableˈl-kısme mezbûre Mehmed Çelebi dahi vefât edip verâseti vâlidesi mezbûre Râbia Hatunˈa ve li-ebeveyn ammi Salih Çelebiˈye münhasıra ve tashîh-i mes’eleleri yirmi dört sehim olup sehm-i mezbûrdan on sehim mezbûre Râbia Hatunˈa ve on dört sehim mezkûr Salih Çelebiˈye isâbet eyledikde şer‘an zâhir ve mütehakkık oldukdan sonra husûs-ı âtiˈl-beyânın hâlinde tahrîri içün biˈl-iltimâs kıbel-i şerî‘at-i mergūbdan irsâl olunan Mevlânâ Eyüb Efendi b. Hüseyin Efendi mahalle-i mezbûrede vâki‘ müteveffâ-i mezbûrun menziline varıp zeyl-i kitâbda mastûrüˈl-esâmî olan Müslimîn huzûrunda akd-i meclis-i şer‘-i hatîr eyledikde mezbûre Râbia Hatun meclis-i ma‘kūd-ı mezbûrda işbu bâ‘isüˈl-kitâb mezkûr Salih Çelebi mahzarında ikrâr ve takrîr-i kelâm edip defter-i kassâm-ı askerî nâtık olduğu üzre müteveffâ-yı mezbûrun cümle terekesini alâ mâ-farazallâhu te‘âlâ beynimizde iktisâm eylediğimizde mahmiye-i mezbûrede el-Hâc Memi mahallesinde vâki‘ bir tarafı Ahmed ve Mahmud nâm kimesneler mülkü ve bir tarafı Hoca Muslı nâm kimesne mülkü ve bir tarafı zikrolunan el-Hâc Memi (…?) Şerîf Vakfı ve bir taraf tarîk-i âm ile mahdûd dört bâb fevkānî oda ve bir bâb tahtânî tahtadan binâ oda ve üç bâb tahtânî oda ve iki fevkānî sofa, dört kenîf ve bir su kuyusu ve eşcâr-ı müsmire ve gayr-ı müsmire hânı mülk menzilin nısf-ı şâyi‘i müteveffâ-yı evvel mezbûrun ileˈl-vefât mülk ve hakkı ve nısf-ı şâyi‘-i âharı işbu Salih Çelebi mülkü olmağla müteveffâ-yı mezbûrun mülkü olan nısf-ı şâyi‘i menzil-i mezbûr mezkûr Salih Çelebiˈnin bi-hükmiˈl-münâsahatiˈş-şer‘iye on dört sehim hissesi mukābelesinde ta‘yîn ve tahsîs olunup min-ba‘d benim içün nısf-ı şâyi‘ menzil-i mezbûrda hak ve alâka kalmadı dedikde mezbûr Salih Çelebi dahi tereke-i müteveffâ-yı mezbûrdan olup mârrüˈz-zikr Yakıcı mahallesinde vâki‘ bir taraf merkūme Râbia Hatun mülkü ve bir tarafı Abdülkerim nâm kimesne vakfı ve bir taraf Yusuf b. Abdullah Vakfı ve bir taraf tarîk-i âm ile mahdûd [25b] bir bâb fevkānî oda ve bir fevkānî matbahı müştemil zokak kapısı müşterek mülk menzili mezbûre Râbia Hatunˈun bi-hükmiˈl-münâsahatiˈş-şer‘iye on sehim hissesi mukābelesinde ta‘yîn ve tahsîs olunup min-ba‘d menzil-i mezbûr işbu Râbia Hatunˈun mülk-i mevrûsudur benim içün hak ve alâkam kalmadı dedikde gıbbeˈt-tasâdikiˈş-şer‘î vâki‘ hâli mevlânâ-yı mezbûr mahâllinde ketb edip ba‘dehû ma‘an ba‘s olan Hüseyin Çelebi b. Osman ile meclis-i şer‘a gelip alâ-vukû‘ihî inhâ ve takrîr-i kelâm etmeğin mâ vaka‘a biˈl-ibtigā ketb olundu. Fiˈl-yevmiˈs-sâmin min-Saferiˈl-hayr li-sene erba‘a ve semânîn ve elf. Şuhûdüˈl-hâl: Mâ-sebak