Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 201 Hüküm no: 112 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Reis b. Ali’nin terekesinden, Ali b. Sadık’a olan borcun ödenmesi İşbu bâ‘isüˈl-vesîka el-Hâc Ali b. el-Hâc Sâdık meclis-i şer‘de mahmiye-i Galata a‘mâlinden kasaba-i Tophâneˈde Cihangir mahallesinden olup İstanköyˈde fevt olan Ahmed Reis b. Aliˈnin verâseti zevce-i metrûkesi Ümmühani b. Aliˈye ve vâlidesi Aynî bt. Mustafaˈya ve li-ebeveyn er karındaşı Mehmed Beşeˈye ve kız karındaşı Havvaˈya ve Emineˈye münhasıra oldukdan sonra mezbûrât taraflarından zikri câ’î husûsa vekîl-i müseccel olan Hüseyin Bey b. Abdülcelil mahzarında üzerine da‘vâ edip müteveffâ-yı mezbûra ikrâz ve teslîm eylediğim yüz esedî guruşu kableˈl-istifâ vefât edip hatta huzûr-ı Müslimînˈde ikrâr ve edâ-i şehâdet dahi etmekle hâlâ terekesinden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı ricâlden Ali Çelebi b. Ahmed ve Ramazan b. Hasan li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında müdde‘î-i mezbûra karzdan yüz guruş deynim vardır deyü ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-hâmis min-Safer sene [10]84. Şuhûdüˈl-hâl: Osman Çelebi b. Ahmed, Mehmed Beşe b. Ali, Mehmed b. Ahmed, Ahmed b. Osman, Hüseyin b. Ali